නීතිවිරෝධී මත්පැන් පානය කර පුද්ගලයන් දෙදෙනෙකු ජීවිතක්ෂයට පත් ව තවත් දෙදෙනකු අසාධ්‍යව රෝහල්ගත කිරීමේ පුවතක් පිටිගලින් වාර්තා වනවා.
දසත ප්‍රාදේශීය වාර්තාකරු පැවසුවේ; ඊයේ (10) රාත්‍රියේ සිට අද (11) පස්වරු 04 තෙක් පිටිගල පොලිස් වසමේ මාදෙණිය පාර – මාරක්ගොඩ, මත්තක ලිපනයේ පදිංචි පද්මකුමාර නමැති අයෙකු විසින් සිය නිවසට නීතිවිරෝධීව නිෂ්පාදනය කරන ලද මත්පැන් බෝතලයක් ගෙනැවිත් ඇති බවයි.
පසුව ඔහු සහ ඔහුගේ මිතුරන් එක්ව ඊයේ රාත්‍රියේ දී මත්පැන් බෝතලය අවසන් වන තෙක් පානය කර තිබෙනවා.
අද අලුයම් කාලය වන විට ඔවුන්ට අසාත්මිකතාවක් ඇති වී කඩිනමින් ඇල්පිටිය රෝහලට ඇතුළත් කිරීමටයි පියවර ගෙන ඇත්තේ.
නමුත් රෝහලට ඇතුළත් කර ප්‍රතිකාර ලබමින් සිටියදී 76 හැවිරිදි හැරිසන් විජේරත්න සහ 60 හැවිරිදි ධර්මපාල යන දෙදෙනකු ජීවිතක්ෂයට පත් ව තිබෙන බවයි රෝහල් පොලිසිය තහවුරු කර තිබෙනවා.
ඔවුන් දෙදෙනාම එම ප්‍රදේශයේ ම පදිංචිකරුවන් බවත් වෘත්තියෙන් ගොවිතැන් සහ රියදුරු වශයෙන් කටයුතු කරන බවත් පොලිස් මූලික පරීක්ෂණවල දී හෙළි ව තිබෙනවා.
මත්පැන් බෝතලය ගෙනා පුද්ගලයා සහ සෙසු පුද්ගලයා ඇල්පිටිය හා කරාපිටිය රෝහල්වල දැඩි සත්කාර ඒකකයේ ප්‍රතිකාර ලබන බව ද පිටිගල පොලිසිය පවසා තිබෙනවා.
සිද්ධිය සම්බන්ධයෙන් පිටිගල පොලිසිය වැඩිදුර පරීක්ෂණ සිදු කරනවා.
