පියයුරු පිළිකාව පිළිබඳ දැනුවත් වීමට නව වෙබ් අඩවියක්

පියයුරු පිළිකාව පිළිබඳ දැනුවත් වීම සඳහා වන නව වෙබ් අඩවියක් හඳුන්වා දී තිබෙනවා.

ජාතික පිළිකා මර්දන වැඩසටහන, සෞඛ්‍ය අමාත්‍යාංශය හා එක්වයි මෙම වෙබ් අඩවිය හඳුන්වා දී ඇත්තේ.

සෞඛ්‍ය අමාත්‍ය කෙහෙලිය රඹුක්වැල්ලගේ ප්‍රධානත්වයෙන් මෙය එළිදැක්වූ අතර breastcancerdetect.health.gov.lk යන වෙබ් අඩවියෙන් ඊට පිවිසිය හැකියි.

පිළිකාව පිළිබඳ දැනුවත් වීම, පරීක්ෂාවන් සඳහා දිනයක් වේලාවක් මාර්ගගත ක්‍රමය ඔස්සේ වෙන් කර ගැනීම මෙමගින් සිදු කර ගැනීමට හැකියාව පවතිනවා.

ජාතික පිළිකා මර්දන වැඩසටහනේ පස් අවුරුදු සැලැස්ම ඔස්සේ මෙම වැඩසටහන ක්‍රියාවට නැංවෙනවා.

2019 වසරේ දී මෙරටින් පියයුරු පිළිකා රෝගීන් 4447 ක් වාර්තා වූ අතර එය 2020 වන විට 5000 ඉක්මවා ඇති බවයි වාර්තා වන්නේ.

2019 දී වාර්තා වූ රෝගීන්ගෙන් 60% ක් එයට පෙර හඳුනා ගැනුණු පළමු හා දෙවන මට්ටමේ රෝගීන්.

2020 වන විට ඇස්තමේන්තුගත වාර්තා අනුව කාන්තාවන් ලක්ෂයකට 27 දෙනෙකු මෙරටින් පියයුරු පිළිකා රෝගීන් ලෙස හඳුනාගෙන ඇති අතර ඉන් ලක්ෂයකට 11 දෙනෙකු මිය යන මට්ටමක් වාර්තා වනවා.

ඉන් වැඩි ප්‍රමාණයක් වයස අවුරුදු 45 – 50 ඉක්මවූ කාන්තාවන්.

මෙහිදී අදහස් දැක්වූ සෞඛ්‍ය අමාත්‍ය කෙහෙලිය රඹුක්වැල්ල කියාසිටියේ කොවිඩ් වසංගතයත් සමග ශ්‍රී ලංකාව තුළ බොහෝ පරිවර්තනයන් ඇතිවූ අතර විශේෂයෙන් අන්තර්ජාල වේදිකා භාවිතය ඉහළ යාමෙන් සෞඛ්‍ය ක්ෂේත්‍රයටද එය පරිවර්තනීය වෙනසකට යොදා ගැනීමට හැකි වූ බවයි.

විශේෂයෙන් ජාතික පිළිකා මර්දන වැඩසටහන සඳහා මෙවැනි තාක්ෂණික ක්‍රමෝපායන් යොදා ගැනීම අතිශය වැදගත් බවද සංවර්ධිත රටවල් බොහොමයක් මෙවැනි ක්‍රමවේද කලකට පෙර භාවිතයට ගෙන ඇති බවද හෙතෙම සඳහන් කළා.

ශ්‍රී ලංකාව වැනි දියුණු වෙමින් පවතින රටකට එවැනි ක්‍රමෝපායන් කරා එකවර යා නොහැකි වුවත් එවැනි ක්‍රමෝපායන් කරා පරිවර්තනය වීම කාලීන අවශ්‍යතාවයක් යැයි ද අමාත්‍යවරයා වැඩිදුරටත් පෙන්වා දෙනු ලැබුවා.

මෙහිදී අදහස් දැක්වූ ජාතික පිළිකා මර්දන වැඩසටහනේ අධ්‍යක්ෂ විශේෂඥ වෛද්‍ය ඊෂානි ප්‍රනාන්දු මහත්මිය..

පියයුරු පිළිකාව කලින් හඳුනා ගතහොත් ශල්‍යකර්ම ඖෂධ භාවිතය විකිරණ ක්‍රමවේද මඟින් නිට්ටාවටම සුවකර ගත හැකි බවත් පියයුරු ආශ්‍රිත සම ඝනවීම ,සම මතුපිට වල ගැසීම, තනපුඩුව මත කුෂ්ඨ ඇති වීම,තන පුඩුවෙන් අසාමාන්‍ය දියරයක් ගැලීම, තනපුඩුව ඇතුළට ගිලීම, තද ගැටිති,පියයුරු වල ප්‍රමාණය හා හැඩය වෙනස් වීම වැනි රෝග ලක්ෂණ ඇත්නම් එම වෙබ් අඩවිය මගින් ලියාපදිංචි වී දිනයක් වේලාවක් වෙන් කරගෙන හෝ පිළිකා කලින් හඳුනා ගැනීමේ මධ්‍යස්ථානයකට හෝ රජයේ වෛද්‍යවරයෙකු වෙත යොමු වීමෙන් මේ සඳහා ප්‍රතිකාර ලබාගත හැකි බවත් පෙන්වා දුන්නා.

පිළිකා කලින් හඳුනා ගැනීමේ ප්‍රධාන මධ්‍යස්ථානය වන නාරාහේන්පිට ජාතික පිළිකා මර්දන කාර්යාලයට අමතරව රත්නපුර, මාතර සහ යාපනය යන දිස්ත්‍රික්කවලද එවැනි මධ්‍යස්ථාන ක්‍රියාත්මක අතර එයට අමතරව දිවයිනේ ප්‍රධාන රෝහල් 24ක පියයුරු පිළිකා සායන පැවැත් වෙනවා.