තෙල්දෙණියේ සිසුවියන් දෙදෙනෙක් වික්ටෝරියා ජලාශයට පනී

පාසල් සිසුවියක් වික්ටෝරියා ජලාශයට පැන සිය දිවි හානිකරගෙන ඇති බව වාර්තා වනවා.

මෙම සිසුවිය ඊයේ (23) දහවල් ඇයගේ තවත් මිතුරියක් ද සමඟ මෙලෙස ජලාශයට පැන ඇති බවයි තෙල්දෙණිය පොලිසිය පැවසුවේ.

එහිදී එක් සිසුවියක් පිහිනාවිත් ජීවිතය බේරාගෙන ඇති අතර,ඇය ප්‍රතිකාර සඳහා තෙල්දෙණිය රෝහලට ඇතුළත් කිරීමෙන් පසු මේ වනවිට එහි ප්‍රතිකාර ලබනවා.

අතුරුදන් වූ අනෙක් සිසුවියගේ මළසිරුර ඊයේ (24) පස්වරුව වනවිට සොයා ගැනීමට ප්‍රදේශවාසීන්ට හැකියාව ලැබී තිබෙනවා.

මෙලෙස සියදිවි හානිකරගෙන ඇත්තේ තෙල්දෙණිය, පූඩලුඋයන ප්‍රදේශයේ පදිංචිව 17 හැවිරිදි පාසල් සිසුවියක්.

තෙල්දෙණිය පොලිසිය පැවසුවේ මිය ගිය සිසුවියගේ පශ්චාත් මරණ පරීක්ෂණය සිදුකිරීමට නියමිත බවයි.

දිවි බේරාගත් අනෙක් සිසුවියගෙන් තවමත් ප්‍රකාශයක් හෝ සටහන් කරගෙන නොමැති අතර,ඇය දැඩි කම්පන තත්ත්වයෙන් පසුවන බව සඳහන්.

පොලීසිය සඳහන් කළේ මෙලෙස සියදිවි හානිකර ගැනීමට හේතුව තවමත් අනාවරණය වී නොමැති බවයි.

සිද්ධිය සම්බන්ධයෙන් තෙල්දෙණිය පොලීසිය වැඩිදුර පරීක්ෂණ පවත්වනු ලබනවා.