ශ්‍රී ලංකාවේ නිරිතදිග වෙරළට ඔබ්බෙන් සැතපුම් 15ක් පමණ දුරින්, ඉරානයට අයත් තෙල් ප්‍රවාහන නෞකා 20ක් පමණ මේ වනවිට අතරමං වී ඇති බව වාර්තා වනවා.
ආහාර, ඉන්ධන සහ පානීය ජලය සපයා ගැනීමේ දැඩි ගැටළුවකට මුහුණ දී ඇති මෙම නෞකාවන් ඒවායේ එන්ජින් ක්‍රියා විරහිත කර එම මුහුදු සීමාවේ නවතාගෙන සිටින බවයි විදෙස් වාර්තා සඳහන් කරන්නේ.
ඉරානයේ තෙල් වෙළෙඳාමට සහාය දක්වන පාර්ශ්වයන්ට එරෙහිව එක්සත් ජනපදය දැඩි පීඩනයක් එල්ල කිරීම හේතුවෙන් අදාළ නෞකාවන්ට මෙලෙස ආහාර, ඉන්ධන සහ පානීය ජලය සපයා ගත නොහැකි තත්ත්වයක් මත ඔවුන් දැඩි අසීරුතාවකට මුහුණපා තිබෙනවා.
ඇමරිකානු සම්බාධකවලට හසුවෙතැයි බියෙන් ඇතැම් ශ්‍රී ලංකා සැපයුම්කරුවන් ද එම ඉරාන නෞකා වෙත සේවා සැපයීමට මැලිකමක් දක්වන බවයි වාර්තා වුණේ.
ඉරානය තම පාලනයට නතු කර ගැනීමේ අරමුණින් එක්සත් ජනපදය විසින් දියත් කර ඇති නව පීඩන වැඩපිළිවෙළේ වඩාත් කැපී පෙනෙන ප්‍රතිඵලය වන්නේ මෙම තත්ත්වයි.
සම්බාධකවලට ලක්වූ චීනය වෙත තෙල් ප්‍රවාහනය කිරීමේ වෙළඳාමට සම්බන්ධ වූ ඉරාන හෝ ඉරානය හා සම්බන්ධ නෞකා රැසක්, හෝර්මුස් සමුද්‍ර සන්ධිය ආශ්‍රිතව එක්සත් ජනපදය විසින් නැවතත් අවහිරතා පැනවූ පසුගිය ජූලි මාසයේ සිට ශ්‍රී ලංකාව සහ මැලේසියාව වැනි ආසියානු රටවල් ආසන්න මුහුදු තීරයේ මෙලෙස අතරමංව සිටිනවා.
