ගල්කිස්ස වෙරළ තීරයේ දී පොලිස් නිලධාරීන් දෙදෙනෙකුට පහර දුන් පාසල් සිසුන් පස්දෙනෙක් ඇතුළු හයදෙනෙකු අත්අඩංගුවට ගත් බව පොලිසිය පවසනවා.
මෙලෙස පහරකෑමට ලක්ව වූ පොලිස් සැරයන්වරයෙකු සහ කොස්තාපල්වරයෙකු ප්‍රතිකාර සඳහා කළුබෝවිල ශික්ෂණ රෝහල වෙත ඇතුළත් කර ඇති බවයි වාර්තා වුණේ.
ගල්කිස්ස වෙරළ තීරයේ ගල්පර සහිත අනතුරුදායක මුහුදේ බීමතින් පුද්ගලයන් පිරිසක් අනාරක්ෂිත ලෙස දිය නාමින් සිටින බවට ගල්කිස්ස පොලිස් වෙරළ ආරක්ෂක ඒකකයේ නිලධාරීන්ට තොරතුරක් ලැබී තිබෙනවා.
අදාළ තොරතුර මත පොලිස් නිලධාරීන් එම ස්ථානයට ගොස් පරීක්ෂා කිරීමේ දී දියනෑමට නුසුදුසු අනාරක්ෂිත ස්ථානයක සිටි පුද්ගලයින් 06 දෙනෙකු නිරීක්ෂණය වී තිබෙනවා.
පසුව ඔවුන්ට එම ස්ථානයේ දිය නෑමට අනාරක්ෂිත බවට දන්වා ඇති අතර, ඉන් පිටව යන ලෙසට පොලිස් නිලධාරීන් දැනුම් දී ඇති බවයි වාර්තා වුණේ.
එම අවස්ථවේ දී එම පිරිස පොලිස් නිලධාරීන්ට පරුෂ වචනයෙන් බැන කලහකාරී ලෙස හැසිරී ඇති අතර, නිලධාරීන් එම තත්ත්වය පාලනය කිරීමට යාමේ දී එම පිරිස පොලිස් නිලධාරීන්ට පහරදී තිබෙනවා.
පසුව මෙම පහරදීමට සම්බන්ධ සැකකරුවන් අත්අඩංගුවට ගැනීමට පොලිසිය කටයුතු කර ඇති අතර, ඔවුන් වයස අවුරුදු 16 සහ 30 අතර වයස්වල පසුවන්නන්.
රත්මලාන, පිළියන්දල සහ අහුන්ගල්ල යන ප්‍රදේශවල පදිංචිකරුවන් වන මොවුන් ගල්කිස්ස මහේස්ත්‍රාත් අධිකරණය වෙත ඉදිරිපත් කිරීමට තිබෙනවා.
