බෝම්බ බියක් හේතුවෙන් කටුනායක ගුවන්තොටුපොළට හදිසියේ ගොඩබෑමක් සිදුකළ ගුවන් යානයේ බෝම්බ සම්බන්ධයෙන් කිසිඳු තර්ජනයක් නොමැති බව ගුවන් තොටුපොළ හා ගුවන් සේවා සමාගම පවසනවා.
යානයේ සිදුකළ පුළුල් සෝදිසි කිරීමෙන් අනතුරුව මෙරට ආරක්ෂක අංශ මේ බව තහවුරු කර තිබෙනවා.
ඉන්දියාවේ විස්තාරා ගුවන් සේවයට අයත් මගී ගුවන් යානයක් කටුනායක ගුවන්තොටුපොළ වෙත අද (19) පස්වරුවේ හදිසි ගොඩබෑමක් සිදුකරනු ලැබුවේ බෝම්බ තර්ජනයක් සම්බන්ධව ගුවන් නියමුවාට ලැබුණු ඇමතුමකට අනුවයි.
ඒ, වන විටත් එහි මගීන් 96 දෙනෙකුගෙන් සහ කාර්යය මණ්ඩලයේ 08 දෙනෙකු රැඳී සිටියා.
අනතුරුව එහි සිටි මගීන් සහ කාර්යය මණ්ඩලය ආරක්ෂිතව ඉන් ඉවත් කිරීමට කටයුතු කළ අතර, පසුව යානය පුළුල් පරික්ෂාවකට ලක්කර තිබෙනවා.
ඒ සඳහා බෝම්බ නිෂ්ක්‍රිය අංශය සහ යුද හමුදා කොමාන්ඩෝ බළකාය කැඳවූ බවයි පොලිස් මාධ්‍ය ප්‍රකාශක නියෝජ්‍ය පොලිස්පති නීතිඥ නිහාල් තල්දුව සඳහන් කළේ.
යූ.කේ. 131 දරන මෙම ගුවන් යානය ඉන්දියාවේ මුම්බායි සිට පැමිණ තිබුණා.
මේ අතර ඉන්දීය ගුවන්සේවාවලට අයත් ගුවන්යානාවල බෝම්බ ඇතැයි තර්ජනාත්මක ඇමතුම් 20ක් අද (19) දිනය තුළ ලැබී ඇති බව ජාත්‍යන්තර මාධ්‍ය වාර්තාකර තිබුණා.
