පොලිස් විශේෂ කාර්ය බලකා නිලධාරීන් බවට පවසා රුපියල් 12,000 ක මුදලක් සහ ජංගම දූරකථනයක් රැගෙන ගිය දෙදෙනෙකු සම්බන්ධයෙන් විමර්ශනයක් ආරම්භ කර ඇති බව වාරියපොළ පොලීසිය පවසනවා.
අප ප්‍රාදේශීය වාර්තාකරු පැවසුවේ; පනාදරගම,මන්දපානවල පදිංචි ව්‍යාපාරිකයෙකු වන ජයකොඩි ආරච්චිගේ විරාජ් ගීතාංජන ජයකොඩි යන අය විසින් සිදු කරන ලද පැමිණිල්ලක් අනුව මෙම විමර්ශනය ආරම්භ කර ඇති බවයි.
ඉකුත් 21 වැනිදා සවස 2.00 ට පමණ මන්දපානවල පදිංචිකරුවෙකු වන චූලක යන අය තවත් පුද්ගලයින් දෙදෙනෙකු සමග යතුරුපැදියකින් පැමිණිලිකාර ව්‍යාපාරිකයා හමුවට පැමිණ තිබෙනවා.
තමන් විශේෂ කාර්ය බලකායේ කුරුණෑගල කඳවුරේ සේවය කරන බව එසේ පැමිණි පුද්ගලයින් දෙදෙනා ව්‍යාපාරිකයාට පවසා ඇති බවයි පැමිණිල්ලේ සඳහන් වන්නේ.
විශේෂ කාර්ය බලකායේ සේවය කරන නිලධාරීන් දෙදෙනා තමන්ව අත්අඩංගුවට ගෙන සිටින බවත්, ඔවුන්ගෙන් නිදහස් වීම සඳහා ලබාදීමට මුදල් අවශ්‍ය බව පවසා තමන් සතුව තිබූ ජංගම දූරකථනය ව්‍යාපාරිකයාට ලබා දී රුපියල් 45,000 ක මුදලක් මන්දපානවල ගමේ පදිංචිකරුවා වන චූලක විසින්
ලබාගෙන ගොස් ඇති බවයි වාර්තා වන්නේ.
22 වැනිදා සවස 5.00 ට පමණ පෙර දින පැමිණි විශේෂ කාර්ය බලකායේ නිලධාරීන් යැයි හඳුන්වා දුන් පුද්ගලයින් දෙදෙනා මෝටර් කාර් රථයකින් ව්‍යාපාරිකයා සොයා පැමිණ ඇති අතර පෙර දින තමන් සමග පැමිණි චූලක විසින් ලබා දුන් ඔහුගේ දූරකථනය අවශ්‍ය බව පවසා එය ව්‍යාපාරිකයාගෙන් ලබා ගැනීමට පැමිණි දෙදෙනා කටයුතු කර ඇත තිබෙනවා.
චූලක ඒ වන විට විශේෂ කාර්ය බලකා කඳවුරේ සිටින බවත්, ප්‍රකාශයක් ලබා ගැනීම සඳහා කඳවුරට
පැමිණෙන ලෙසත් ඔවුන් ව්‍යාපාරිකයාට පවසා ඇති බවයි වාර්තා වන්නේ.
තමන් වරදක් කර නොමැති බැවින් කඳවුරට යාමට අවශ්‍යතාවක් නොමැති බව එවිට ව්‍යාපාරිකයා පවසා ඇති අතර; පසුව පැමිණි දෙදෙනා දූරකථන ඇමතුමක් ලබා ගෙන කිසියම් අයෙකුට ‘සර්’යනුවෙන් ආමන්ත්‍රණය කර තිබෙනවා.
අනතුරුව ඔවුන් ව්‍යාපාරිකයාට පවසා ඇත්තේ මෙම සිද්ධිය ගොඩින් බේරා ගැනීමට නම් කඳවුරේ පැවැත්වෙන සාදයක් සදහා අරක්කු බෝතල් 15 ක් ලබාදෙන ලෙසයි.
නමුත් තමන් සතුව එතරම් මුදලක් නොමැති බැවින් අවශ්‍ය වන්නේ නම් රුපියල් 5000 ක් ලබා දිය හැකි බව ව්‍යාපාරිකයා පවසා තිබෙනවා.
පැමිණි පුද්ගලයින් දෙදෙනාගේ බල කිරීම නිසාම ඔවුන්ට රුපියල් 12,000 ක මුදලක් ලබා දීමට ව්‍යාපාරිකයා කටයුතු කර ඇති බවයි හෙළි ව ඇත්තේ.
චූලක යන අය විසින් ව්‍යාපාරිකයාට දී මුදල් ලබා ගෙන තිබූ ජංගම දූරකථනය සහ රුපියල් 12,000 ක මුදල ලබාගෙන එම පුද්ගලයින් දෙදෙනා ඔවුන් පැමිණි මෝටර් කාර් රථයෙන්ම පිටත්ව ගිය බව ව්‍යාපාරිකයා පොලීසිය හමුවේ ප්‍රකාශ කෙරුණා.
මෙම සිදුවීම සිදු වන විට තමන්ගේ මව, පියා සහ සහෝදරයා ද නිවසේ සිටි බව පැමිණිලිකරු පොලීසිය හමුවේ පවසා තිබෙනවා.
නමුත් මුදල් සහ ජංගම දූරකථනය රැගෙන ගිය අයවළුන් පැමිණි මෝටර් කාර් රථයේ ලියාපදිංචි අංකය
ව්‍යාපාරිකයා විසින් සටහන් කරගෙන නොමැති බව ද පොලීසිය සඳහන් කළා.
මෙම සිද්ධිය සම්බන්ධයෙන් වාරියපොළ විමර්ශන ක්‍රියාත්මකයි.
