ජනප්‍රිය බ්‍රිතාන්‍ය ජාතික සංගීත කණ්ඩායමක් වන ”One Direction’ සාමාජික ලියම් ජේම්ස් පේන් (Liam Payne) හදිසියේ ජීවිතක්ෂයට පත් ව තිබෙනවා.
ආර්ජින්ටිනාවේ බුවනෝස් අයර්ස් හි හෝටලයක තුන්වැනි මහලෙන් ඇදවැටීමෙන් ඔහුගේ මරණය සිදු ව ඇති බවයි විදෙස් මාධ්‍ය වාර්තා කරන්නේ.
දෙසතියකට පෙර සිය සංගීත කණ්ඩායමේ හිටපු සගයකු වන නියාල් හොරන්ගේ ප්‍රසංගයක් සඳහා නගරයට ලියම් පැමිණ ඇති බවත් එම අවස්ථාවේ දී රැඳී සිටි හෝටලයේ දී මෙම මරණය සිදු ව ඇති බවත් වාර්තා වනවා.
2010 වසරෙන් පසුව අතිශය ජනප්‍රියත්වයට පත් වූ තාරුණ්‍යයේ සංගීත කණ්ඩායමක් වන One Direction කණ්ඩායමේ නිත්‍ය ගායකයෙකු ලෙසයි ලියම් ජේම්ස් කටයුතු කළේ.
ලියම් පේන් 2008 දී බ්‍රිතාන්‍ය රූපවාහිනී කතා මාලාවක් වන ද ‘එක්ස් ෆැක්ටර්’ සඳහා ගායකයෙකු ලෙස සිය මංගල දර්ශනය ආරම්භ කළා.
1993 අගෝස්තු 29 වැනිදින බ්‍රිතාන්‍යයේ වුල්වර්හැම්ප්ටන් හි දී උපත ලැබූ අතර හෙතෙම ජීවිතක්ෂයට පත් වන විට 31 හැවිරිදි වියෙහි පසුවුණා.
හිටපු One Direction තරුවක් වන ලියැම් පේන්ගේ මරණය ගැන ශෝක වීමට රසිකයෝ හෝටල් පරිශ්‍රය වෙත පැමිණ ඇති බවත් වාර්තා වනවා.
