රජයේ වෛද්‍ය නිලධාරින්ගේ සංගමය එළඹෙන සතියේ වැඩ වර්ජනයක් සිදු කිරීමට සූදානමින් සිටිනවා.
අද (11) පැවති මාධ්‍ය හමුවක දී රජයේ වෛද්‍ය නිලධාරීන්ගේ සංගමයේ ලේකම් ප්‍රභාත් සුගතපාල පැවසුවේ
එළඹෙන බදාදා දින එනම් සැප්තැම්බර් මස 18 වැනිදා දිවයින පුරා දීපව්‍යාප්ත වර්ජනයක් සිදු කරන බවයි.
එමෙන්ම අද දින සිට ක්‍රියාත්මක වන පරිදි දිවයිනේ සියලු රෝහල්වල කළු කොඩි දැමීමට ද තීරණය කර ඇති බවයි ලේකම් ප්‍රභාත් මහතා පැවසුවේ.
සිය වෘත්තිය තුළ රෝගී සත්කාරය ඉහළින් සිදු කිරීමේ දී රෝහල් පද්ධතියේ පවතින අඩුපාඩු, ඖෂධවල හිඟකම පිළිබඳ ව මහජනතාවට දැනුම්වත් කිරීමට අයිතියක් පවතින බවත්; සෞඛ්‍ය අමාත්‍යාංශය මැදිහත් වී මේ සිදු කරන විනය පරීක්ෂණය පක්ෂග්‍රාහී ක්‍රියාවක් බවට ද රජයේ වෛද්‍ය නිලධාරීන්ගේ සංගමය චෝදනා කරනවා.
ඊයේ (10) දින වෛද්‍ය සංගමයේ විධායක කමිටුව මෙන් ම මධ්‍යම කාරක සභාව එක් ව තීරණ විශාල ප්‍රමාණයක් ගත් බවත්; වෛද්‍ය පාලිත රාජපක්ෂට එරෙහිව විනය පරීක්ෂණ කරන්න එපා යැයි සෞඛ්‍ය අමාත්‍යවරයා සහ සෞඛ්‍ය අමාත්‍යාංශයෙන් දැනුම්දී ඇත්නම්; ඔහුට විරුද්ධ ව කිසිදු පැමිණිල්ලක් නොමැති නම් මෙම විනය පරීක්ෂණය කුමන පදනමක් මත, කාගේ වුවමනාවකට සිදු කරන්නේ දැයි රජයේ වෛද්‍ය නිලධාරීන්ගේ සංගමය ප්‍රශ්න කර සිටිනවා.
අද දින සිට සියලුම රෝහල්වල මේ හේතුවෙන් දින හතක් කළු කොඩි දැමීමට තීරණය කර ඇති බවත්; දින 07 අවසානයේ දී විනය පරීක්ෂණය අවසන් කිරීමට තීරණය නොකළහොත් එළඹෙන 18 වැනිදා දීප ව්‍යාප්ත වැඩ වර්ජනයක් සිදු කරන බවයි රජයේ වෛද්‍ය නිලධාරීන්ගේ සංගමය දැනුම්දී ඇත්තේ.
එසේ වුවහොත් මෙම වැඩ වැරුම සැප්තැම්බර් 18 වැනි දින උදේ 8 සිට ක්‍රියාත්මක වනු ඇති.
