සංචාරක ශ්‍රී ලංකා කණ්ඩායම සහ ඔස්ට්‍රේලියාව අතර පැවැත්වෙන තරග පහකින් සමන්විත විස්සයි විස්ස ක්‍රිකට් තරගාවලියේ ජයග්‍රහණය තීරණය කෙරෙන තීරණාත්මක තුන්වැනි තරගය අද (15 වැනිදා) දහවල් 1.40ට කැන්බරා ක්‍රිකට් ක්‍රීඩාංගණයේදී ආරම්භ වේ.
පැවැති තරග දෙකම ඔස්ට්‍රේලියාව ජය ගැනීම හමුවේ තරගාවලි පරාජයෙන් බේරීමටනම් ශ්‍රී ලංකාව අද (15 වැනිදා) තරගය අනිවාර්යයෙන් ජයගත යුතුව තිබේ. කොවිඩ් වයිරසය ආසාදනය වී සුවය ලැබූ කුසල් මෙන්ඩිස් ඊයේ ශ්‍රී ලංකා කණ්ඩායම සමගින් පුහුණුවීම් සඳහා එක්ව සිටියේය. මෙන්ඩිස්ට අද තරගය ක්‍රීඩා කිරීමට වැඩි අවස්ථාවක් පවතින අතර යම් හෙයකින් ඔහු කණ්ඩායමට ඇතුළත් වුවහොත් පැවැති තරග දෙකෙහිම පිතිකරුවකු ලෙස අසාර්ථක වූ ආරම්භක පිතිකරු ධනුෂ්ක ගුණතිලකට කණ්ඩායමෙන් ඉවත් වීමට සිදුවනු ඇත.
මේ අතර මෙතෙක් ශ්‍රී ලංකාව වෙනුවෙන් ජාත්‍යන්තර තරග වරම් දිනා නොමැති ජනිත් ලියනගේ අවිශ්ක ප්‍රනාන්දු වෙනුවට කණ්ඩායමට ඇතුළත් වීමේ වැඩි අවස්ථාවක් පවතින බවටද සැලවේ. දෙරට අතර පැවැති පළමු තරගයෙන් අනතුරුව කොවිඩ් වයිරසය අසාදනය වූ බිනුර ප්‍රනාන්දුට අද තරගය සහ ලබන 18 වැනිදා පැවැත්වෙන තරගය අහිමි වී යනු ඇත. ඒ අනුව එම තරග දෙකෙහිදීත් නුවන් තුෂාර වේග පන්දු යවන්නකු වශයෙන් සිය දායකත්වය කණ්ඩායමට ලබා දීමට නියමිතය.
ශ්‍රී ලංකා කණ්ඩායම
ධනුෂ්ක ගුණතිලක හෝ කුසල් මෙන්ඩිස්, පැතුම් නිශ්ශංක, චරිත් අසලංක, අවිශ්ක ප්‍රනාන්දු හෝ ජනිත් ලියනගේ, දිනේෂ් චන්දිමාල්, දසුන් ශානක, වනිඳු හසරංග, චාමික කරුණාරත්න, දුෂ්මන්ත චමීර, මහීෂ් තීක්ෂණ, නුවන් තුෂාර.
