කැන්ගරු දේශයේ දී ඉන්දීය කණ්ඩායමේ පළමු ඉනිම කඩුලු අතරේ සේදී යයි

සංචාරක ඉන්දියාව සහ ඔස්ට්‍රෙලියාව අතර පැවැත්වෙන පළමු ටෙස්ට් තරගයේ ප්‍රබල ඉන්දීය කණ්ඩායම සිය පළමු ඉනිමේ දී සියලු ක්‍රීඩකයින් ලකුණු 150කට දැවී ගියා.

අද (22) තරගය එරට වේලාවෙන් පෙරවරු 7.30ට ආරම්භ වුණේ කාසියේ වාසිය ඉන්දියාවට හිමිකර දෙමින්.

ඒ අනුව පළමුව පන්දුවට පහරදීමට ඉන්දීය නායක ජස්ප්‍රිට් බුම්‍රා තීරණය කළා.

කෙසේවෙතත් තම මව්බිමේ දී පළමු ඉනිම වෙනුවෙන් ශක්තිමත් ලකුණු පුවරුවක් නිර්මාණය කරගැනීමට නම් ඔස්ට්‍රෙලියානු වේග පන්දු බලඇණිය ඉන්දීය පිතිකරුවන්ට ඉඩක් දුන්නේ නැහැ.

ලකුණු 80ක් වනවිටත් කඩුලු 06ක් අහිමි ව සිටි ඉන්දීය කණ්ඩායම යම් තාක් දුරකට හෝ ඔසවා තබන්නට ජාත්‍යන්තර මංගල ටෙස්ට් වරම් ඔස්ට්‍රෙලියාවට එරෙහිව අද ලබා ගත් නිටිෂ් කුමාර්ට හැකි වුණා.

නිටිෂ් කුමාර් ලකුණු 41ක් රැස් කළ අතර රිෂාබ් පාන්ට් ලකුණු 37යි.

කේ. එල් රාහුල් ලකුණු 26ක් ලබාගත්තා.

පසුගිය තරගවල දී ද අසාර්ථක වූ කින්ග් කෝලි අද දිනයේ දිත් අසාර්ථක වූයේ හේසල්වුඩ්ගේ පන්දුවක් හමුවේ ලකුණු 05කට දැවී යාමට ලක්වීමෙන්.

කඩුලු බිඳ දැමීමේ දී ඔස්ට්‍රෙලියාව වෙනුවෙන් ජොෂ් හේසල්වුඩ් ලකුණු 29කට කඩුලු 04ක් සහ මිචෙල් ස්ටාක්, පැට් කමින්ස් සහ මිචෙල් මාර්ෂ් කඩුලු 02ක බැගින් බිඳ දැමුවා.

ඒ අනුව ඉන්දීය පළමු ඉනිම ලකුණු 150කට පර්ත් නුවර දී සීමා වුණු අතර මේ වනවිට ඔස්ට්‍රෙලියාව සිය පළමු ඉනිමට පිතිකරණය අරඹා තිබෙනවා.

ඔස්ට්‍රෙලියාව එක් කඩුල්ලක් දැවී ලබා සිටින ලකුණු සංඛ්‍යාව 14ක්.

බුම්‍රාගේ පන්දුවක් හමුවේ පළමු කඩුල්ල ලෙස දැවී ගියේ ලකුණු 10ක් අතැතිව සිටි Nathan McSweeney යි.