ජාත්‍යන්තර වෙළෙඳ නීතිය පිළිබඳ එක්සත් ජාතීන්ගේ කොමිසමේ (UNCITRAL) සාමාජිකයෙකු වීමට ශ්‍රී ලංකාව සුදුසුකම් ලබා තිබෙනවා.
විදේශ කටයුතු අමාත්‍යාංශය නිවේදනයක් නිකුත් කරමින් සඳහන් කළේ; මෙම කොමිසම හා එක් වූ රාජ්‍යයන් 31ක් ඇති බවත් ඉන් එක් රාජ්‍යයක් බවට පත්වීමට ශ්‍රී ලංකාව පෙරේදා (20) දිනයේ දී සුදුසුකම් ලබා ගත් බවයි.
ජාත්‍යන්තර වෙළෙඳ නීතිය පිළිබඳ එක්සත් ජාතීන්ගේ කොමිසමට ශ්‍රී ලංකාව ආසියා පැසිෆික් කණ්ඩායමෙන් ආසනයක් සඳහා තරග කළා.
එහිදී ශ්‍රී ලංකාව වෙනුවෙන් මණ්ඩලයේ සාමාජිකයින්ගෙන් ඡන්ද 177 ක් හිමි වූ බවයි වාර්තා වන්නේ.
එමෙන්ම එම කණ්ඩායම තුළ දෙවැනි ඉහළතම මනාප සංඛ්‍යාව ද හිමි වූයේ ශ්‍රී ලංකාව වෙතයි.
ආසියා – පැසිෆික් සමූහයෙන් ජාත්‍යන්තර වෙළෙඳ නීතිය අනුගමනය කරන රාජ්‍යයන් තෝරාපත් කරගැනීමේ සටනින් ජයග්‍රහණය කළ සෙසු රාජ්‍යයන් වන්නේ; මැලේසියාව, පිලිපීනය, සිංගප්පූරුව, වියට්නාමය, චීනය, ජපානය සහ කොරියානු ජනරජය යි.
ශ්‍රී ලංකාව 2025 ජනවාරි මාසයේ සිට වසර හයක කාලයක් එක්සත් ජාතීන්ගේ මහා මණ්ඩලයේ ජාත්‍යන්තර වෙළෙඳ නීති මණ්ඩලය සමග සේවය කරනු ඇති.
UNCITRAL, 1966 හි පිහිටුවනු ලැබූ අතර එහි මූලස්ථානය ඔස්ට්‍රියාවේ වියානා නුවර පිහිටා තිබෙනවා.
ජාත්‍යන්තරව පැන නගින වෙළෙඳ ආරවුල් විසඳීම සහ වෙළෙඳ නීති තීන්දු කිරීම මෙහි ප්‍රධාන කාර්‍යයභාරයයි.
ශ්‍රී ලංකාව මීට පෙර 2004 – 2007 සහ 2016 දී UNCITRAL හි සාමාජිකයෙකු ලෙස සේවය කර තිබෙනවා.
