නඩුවක සාක්ෂි ලබාදීම සඳහා අධිකරණයේ පෙනී නොසිටි EPDP පක්ෂයේ නායක හිටපු අමාත්ය ඩග්ලස් දේවානන්ද මහතාට වරෙන්තු නිකුත් කිරීමට කොළඹ අතිරේක මහේස්ත්රාත් පසන් අමරසේන මහතා අද (21) නියෝග කළා.
වැල්ලවත්තේ පදිංචි සුභ්රමනියන් මනෝහරන් යන ව්යාපාරිකයා විසින් අගරු චෙක්පත් ලබා දී රුපියල් කෝටි දෙකක වංචාවක් සිදු කළ බවට ඩග්ලස් දේවානන්ද මහතා කළ පැමිණිල්ලක් අනුව රහස් පොලිසිය මගින් පැවරූ නඩුවේ සාක්ෂි ලබාදීම සඳහා අධිකරණයේ පෙනී නොසිටීම හේතුවෙන් මෙම වරෙන්තුව නිකුත් කර ඇති බවයි දසත අධිකරණ වාර්තාකරු පැවසුවේ.
ඩග්ලස් දේවානන්ද මහතා වෙනුවෙන් පෙනී සිටි නිතීඥවරයා පවසා සිටියේ සාක්ෂිකරු අසනීපයෙන් පසුවන බැවින් අධිකරණයේ පෙනී නොසිටින බවයි.
අසනීප තත්ත්වය සම්බන්ධයෙන් වෛද්ය වාර්තාවක් ඉදිරිපත් නොකිරීම හේතුවෙන් මෙම වරෙන්තුව නිකුත් කිරිමට අතිරේක මහේස්ත්රාත්වරයා කටයුතු කළා.
2016 ජූලි 9 වැනි දින හෝ ඊට ආසන්න දිනක දී රුපියල් මිලියන 10 බැගින් වූ චෙක්පත් දෙකක් ගිණුමේ මුදල් නොමැති බව දැන දැනම ලබා දී වංචා කිරීමේ චෝදනාව යටතේ මෙම නඩුව වැල්ලවත්තේ පදිංචි සුභ්රමනියන් මනෝහරන් යන ව්යාපාරිකයාට එරෙහිව පවරා තිබෙනවා.
චූදිත වෙනුවෙන් පෙනී සිටි නීතිඥ සම්පත් හේවාපතිරණ මහතා අධිකරණය කරුණු දක්වමින් කියා සිටියේ නඩුවේ පළමු වන සාක්කිකරු වන දේවානන්ද මහතාට සාක්ෂි ලබාදීම සඳහා අවසන් වරට දින ලබා දී ඇති බවයි.
මෙම සාක්ෂිකරු පසුගිය නඩු වාරයේ දී ද අධිකරණයේ පෙනී නොසිට ඇති බව ද නීතිඥවරයා පෙන්වාදුන්නා.
දෙපාර්ශ්වයේ කරුණු සලකා බැලූ මහේස්ත්රාත්වරයා සාක්ෂිකරුට වරෙන්තු නිකුත් කරමින් පැමිණිලි විභාගය ජනවාරි 23 වැනි දිනට නියම කළා.
