ආරක්ෂක අමාත්‍යාංශයේ ප්‍රමුඛතාව හුදෙක් ආපදාවලට ප්‍රතිචාර දැක්වීමෙන් ඔබ්බට ගොස් සැබෑ ඔරොත්තු දීමේ හැකියාව පෝෂණය කිරීම බව ආරක්ෂක ලේකම් එයාර් වයිස් මාර්ෂල් සම්පත් තුයියකොන්තා (විශ්‍රාමික) මහතා පවසනවා.
ආරක්ෂක අමාත්‍යාංශය නිවේදනයක් නිකුත් කරමින් සඳහන් කළේ; ඊයේ (04) කොළඹ, ගාලු මුවදොර හෝටලයේ පැවති ආපදා කළමනාකරණ මධ්‍යස්ථානය විසින් සංවිධානය කරන ලද ජාතික සම්මන්ත්‍රණය – 2024 හි ප්‍රධාන ආරාධිත අමුත්තා ලෙස සහභාගී වෙමින් කළ කතාවේ දීයි.
ආපදා කළමනාකරණය සඳහා ජාතික මට්ටමේ සිට ප්‍රාදේශීය මට්ටම් දක්වා වූ පුළුල් මෙන්ම, මනාව සම්බන්ධීකරණය වූ ප්‍රතිචාරයක් අවශ්‍ය බවත් ඒ මහතා මෙහිදී අවධාරණය කළා.
නව ජනාධිපතිවරයාගේ නායකත්වය යටතේ වත්මන් රජයේ හුදෙක් අපේක්ෂාව වන්නේ පෙර සූදානමක් සහිතව ආපදා සඳහා ඔරොත්තු දීමේ හැකියාව ගොඩනැගීම බවත් සම්පත් තුයියකොන්තා මහතා ප්‍රකාශ කළා.
පශ්චාත් ආපදා තත්ත්වයන් හි දි තම අතිශය තීරණාත්මක භූමිකාව තුළ ක්‍රියාත්මක වෙමින් තමන් වෙත පැවරෙන කාර්යභාරය සිදු කරනු ලබන අතර ම දරිද්‍රතාව අවම කිරීම සහ ප්‍රජා සවිබල ගැන්වීම අවධාරණය කරමින් ජනතාවට ආපදා හමුවේ මෙන් ම, ඉන් පසුව ද ඒ සඳහා ශක්තිමත්ව මුහුණදීමට ඇති හැකියාව ඉහළ නැංවීමට කටයුතු කරනු ලබන බවයි ආරක්ෂක ලේකම්වරයා මෙහිදී වැඩිදුරටත් අදහස් දක්වමින් කියා සිටියේ.
‘Reflections on Two Decades from Tragedy to Resilience: Retrospect of the 2004 Indian Ocean Tsunami’ යන තේමාව යටතේ මෙම සම්මන්ත්‍රණය පැවැත්වුණා.
