හිටපු රාජ්‍ය අමාත්‍ය ලොහාන් රත්වත්තේ විසින් භාවිත කළ බව කියන ව්‍යාජ අංක තහඩු යෙදූ තවත් ජීප් රථයක් සොයාගෙන තිබෙනවා.
තෙල්දෙණිය පොලිස් වසමේ පාළු නිවසක ගරාජයක් තුළ තිබී එම රථය පොලිසිය විසින් සොයාගෙන ඇති බවයි තොරතුරු වාර්තා වුණේ.
තෙල්දෙණිය පොලිසියට ලද තොරතුරකට අනුව මෙම ජීප් රථය සොයාගෙන ඇති අතර, මෙලෙස සොයාගෙන ඇත්තේ මිට්සුබිෂි වර්ගයට අයත් ජීප් රථයක්.
එම ජීප් රථය සඳහා KN 5556 යනුවෙන් ව්‍යාජ අංක තහඩුවක් සවිකොට තිබී ඇති අතර, ඒ ඔස්සේ සිදු කරන ලද විමර්ශනවල දී එම අංකය හිමි තවත් රතු පැහැති ප්‍රාඩෝ වර්ගයේ ජීප් රථයක් පොලිසිය විසින් හඳුනාගෙන තිබෙනවා.
මේ අතර හිටපු රාජ්‍ය අමාත්‍ය ලොහාන් රත්වත්තේගේ බිරිඳට අයත් බව කියන මිරිහාන ප්‍රදේශයේ පිහිටි නිවසක තිබී සුඛෝපභෝගි මෝටර් රථයක් පසුගිය 26 වනදා සොයාගත්තා.
මෙම සිද්ධියට අදාළව අත්අඩංගුවට ගැනුණු හිටපු රාජ්‍ය අමාත්‍යවරයා ඊයේ (31) දින අධිකරණයට ඉදිරිපත් කිරීමෙන් පසු නොවැම්බර් මස 07 වනදා දක්වා රක්ෂිත බන්ධනාගාර ගතකරනු ලැබුවා.
