ඉන්දියානු ගුවන් සමාගම් විසින් මෙහෙයවනු ලබන දේශීය හා ජාත්‍යන්තර ගුවන් ගමන් 25 කට වැඩි සංඛ්‍යාවකට අද (25) දිනයේ බෝම්බ තර්ජන එල්ල වූ බව විදෙස් මාධ්‍ය වාර්තා කරනවා.
ඒ, අනුව ඉන්ඩිගෝ, විස්තාරා සහ ස්පයිස් ජෙට් යන ගුවන් සමාගම්වල යානා 07 බැගින් තර්ජන එල්ල වී ඇති අතර, එයාර් ඉන්දියා ගුවන් යානා 06කට අද දිනයේ මෙලෙස බෝම්බ තර්ජන එල්ල වී තිබෙනවා.
මේ අතර විදෙස් මාධ්‍ය වාර්තා කරන්නේ දින 12ක් තුළ ඉන්දීය ගුවන් සමාගම් විසින් ක්‍රියාත්මක කරන ලද ගුවන් යානා 275කට අධික සංඛ්‍යාවකට මෙලෙස බෝම්බ තර්ජන එල්ල වී ඇති බවයි.
මෙම බොහෝ තර්ජන එල්ල වී ඇත්තේ සමාජ මාධ්‍ය හරහා බවයි වාර්තා වුණේ.
මේ අතර ඉන්දීය තොරතුරු තාක්ෂණ අමාත්‍යාංශය සමාජ මාධ්‍ය සමාගම්වලට දැනුම් දී ඇත්තේ, බෝම්බ තර්ජන සම්බන්ධ තොරතුරු රජයට සහ නීතිය ක්‍රියාත්මක කරන ආයතනවලට කඩිනමින් ලබා දෙන ලෙසයි.
බෝම්බ තර්ජන එල්ල වීමත් සමඟ ගුවන් ගමන් වාර ගණනාවක් අවලංගු කිරීමට, ප්‍රමාද කිරීමට හෝ සෝදිසි කිරීම්වලට ලක් කිරීමට සිදුවී ඇති බවයි වැඩිදුරටත් තොරතුරු වාර්තා වන්නේ.
