දිවයිනේ බොහෝ ප්‍රදේශවලට ඊයේ (10) පස්වරුවේ සිට ඇදහැලුණු මිලිමීටර් 75ට වැඩි තද වැසි හේතුවෙන් ඇතැම් ප්‍රදේශවලට සුළු ගංවතුර තත්ත්ව ඇති ව තිබෙන බවට වාර්තා වනවා.
දකුණු පළාතේ ගාල්ල- උඩුගම සහ මාපලගම ප්‍රදේශවලට ඇදහැලුණු ධාරානිපාත වර්ෂාව හේතුවෙන් ගිං ගඟේ ජල මට්ටම මේ වන විට ඉහළ ගොස් තිබෙනවා.
මේ හේතුවෙන් මාපලගම ප්‍රදේශයේ පහත් බිම් කිහිපයක්ම ජලයෙන් යට වී ඇති අතර මාපලගම – ගෝනලගොඩ මාර්ගය ජලයෙන් යටවීමෙන් ගමනාගමනයට බාධා ඇති වී තිබෙන බවයි දසත ප්‍රාදේශීය වාර්තාකරු සඳහන් කළේ.
මේ අතර කළුතර දිස්ත්‍රික්කයේ වලල්ලාවිට ප්‍රාදේශීය ලේකම් කොට්ඨාසයේ පැලවත්ත, වැල්මීගොඩ, කුම්බදුව යන ප්‍රදේශවල ප්‍රධාන මාර්ග සහ එම අවට අතුරු මාර්ග සියල්ලන්ම ජලයෙන් යට වී තිබෙනවා.
මෙම ගංවතුර තත්ත්වය නිසා පැලවත්ත මතුගම මාර්ගයේ ගමනාගමනයට ද දැඩි බාධා එල්ල වුණා.
ප්‍රදේශයේ නිවාස කිහිපයක් ජලයෙන් යටවීම නිසා ජන ජීවිතයට ද විශාල ලෙස බාධා ඇති ඇති ව තිබෙන බවයි වාර්තා වන්නේ.
එමෙන්ම කළුතර – හිල්වීදිය ප්‍රධාන මාර්ගයේ බෝතුවත්ත ප්‍රදේශයෙන් ඇති වී තිබෙන සුළු ගංවතුර තත්ත්වය හේතුවෙන් එම මාර්ගයේ ධාවනයට බාධා එල්ල වී තිබෙනවා.
යටියන්තොට අප ප්‍රාදේශීය වාර්තාකරු පැවසුවේ; රාත්‍රියේ සිට ඇදහැලෙන අධික වර්ෂාව නිසා අවිස්සාවේල්ල – පුවක්පිටිය, ධර්මපාල මාවත සහ අවිස්සාවේල්ල කොළඹ මාර්ගය මිරිස්වත්ත- පුවක්පිටිය ප්‍රදේශයෙන් ජලයෙන් යට වී ඇති බවත් ප්‍රධාන මාර්ගයේ වාහන ගමනාගමනයට ද බාධා එල්ල වී ඇති බවයි.
එමෙන්ම කැලණි ගං දෝණිය අවට සිටින ජනතාවට ගංවතුර අනතුරු ඇඟවීමේ පළමු මට්ටමේ නිවේදනයක් ද නිකුත් කර තිබෙනවා.
වාරිමාර්ග දෙපාර්තමේන්තුව නිකුත් කළ නිවේදනයේ දැක්වෙන්නේ; ඉදිරි පැය 48ක කාලය තුළ දෙහිඕවිට, රුවන්වැල්ල, සීතාවක, දොම්පේ, හෝමාගම, කඩුවෙල, බියගම, කොළොන්නාව, කොළඹ සහ වත්තල යන පහත්බිම්වලට ගංවතුර තත්ත්වයක් ඇති විය හැකි අතර ඒ පිළිබඳ ව දැඩිව අවධානයෙන් කටයුතු කරන ලෙසයි.
මේ අතර කාලගුණ විද්‍යා දෙපාර්තමේන්තුව පැවසුවේ අද දිනයේ දී ඇතැම් ප්‍රදේශවලට මිලිමීටර් 150කට අධික වර්ෂාපතනයක් බලාපොරොත්තු විය හැකි බවත් වායුගෝලයේ කැලඹීම් තවදුරටත් පැවතීම මීට හේතුවක් වී ඇති බවයි.
