විදුලිබල ඇමති අමාත්‍යාංශයෙන් පිටව යද්දි ඉතිරි තෙල් තොග ගැනත් කියයි (ඡායාරූප)

විදුලිබල හා බලශක්ති අමාත්‍ය කංචන විජේසේකර සිය අමාත්‍යාංශයෙන් ඉවත් ගොස් තිබෙනවා.

අමාත්‍යවරයා සිය ඉවත්වීම නිල X ගිණුමෙහි සටහනක් තබමින් ප්‍රකාශ කර තිබෙනවා.

තමන් ඊයේ (22) දින රජයෙන් ලබා දුන් සියලුම වාහන සහ අමාත්‍යාංශය විෂය පථයට අයත් සියල්ල ම භාර දී අවසන් බව ද හිටපු අමාත්‍යවරයා සඳහන් කර තිබෙනවා.

එමෙන්ම විදුලිබල හා බලශක්ති අමාත්‍යාංශයෙන් ඉවත්ව යන විට දී වඩා ශක්තිමත් මූල්‍ය තත්ත්වයන් සහ විදුලිබල උත්පාදනය සහ ඉන්ධන සැපයීම සඳහා ප්‍රමාණවත් ඛනිජ තෙල් නිෂ්පාදන සහ ගල් අඟුරු තොග සහිතව එය භාර දී ඇති බවයි කංචන විජේසේකර මහතා පවසා ඇත්තේ.

රටේ සියලුම ආයතන මේ වනවිට යම් කිසි අයුරකින් ධනාත්මක ශේෂ පත්‍රවල පවතින බවත්, එහි සේවාවන් සඳහා පිරිවැය අයකර ගැනීම, සැපයුම්කරුවන් සඳහා නියමිත වේලාවට ගෙවීම් කිරීම, හිඟ ණය සඳහා සේවා සැපයීම සහ එය උපයන අමතර ආදායමෙන් භාණ්ඩාගාරයට සැපයීම සහ සහාය වීම යනාදී කටයුතු සිදු කර ඇති බව ද හිටපු විදුලිබල අමාත්‍යවරයා සඳහන් කර තිබෙනවා.

එමෙන්ම අවසන් වශයෙන් හිටපු අමාත්‍යවරයා පවසා ඇත්තේ; රට අසීරු මොහොතක තිබියදී තමන් ගැන විශ්වාසය තබා එම තනතුර ලබා දුන් හිටපු ජනාධිපති රනිල් වික්‍රමසිංහ මහතාට විශේෂ ස්තුතිය පිරිනමන බවයි.

තම අමාත්‍යාංශයේ සහ ආයතනවල නිලධාරීන් සහ කාර්ය මණ්ඩලය, රාජ්‍යතාන්ත්‍රික දූත මණ්ඩල, සංවර්ධන ආයතන, විවිධ රාජ්‍ය සහ පෞද්ගලික පාර්ශ්වකරුවන් සහ පසුගිය වසර දෙක තුළ සහාය වූ සැමට හිටපු අමාත්‍යවරයාගේ ස්තුතිය හිමිව තිබෙනවා.

සිය නිල X ගිණුමෙහි කාංචන විජේසේකර මහතා වැඩිදුරටත් පවසා ඇත්තේ මෙවැන්නක්;

”2022 දී පැය 4-13 ක විදුලි කප්පාදුවක්, ඉන්ධන තත්ත්වයක්, ගල් අඟුරු නොමැති වීම්, ඛනිජ තෙල් නිෂ්පාදන, සැපයුම්කරුවන්, මුදල් හිඟවීම් මධ්‍යයේ පැවති රටට අවශ්‍ය විදුලි උත්පාදනය, ගල් අඟුරු සැපයීම්, ඛනිජ තෙල් නිෂ්පාදන ආදිය ප්‍රමාණවත් පරිදි සැපයීමට ඇති පසුබිමක් ශේෂ කරමින් සහ ඉන්ධන සහ බලශක්ති උත්පාදනය අඛණ්ඩව සැපයීම ස්ථාවර කරමින් මම මින් පිටත් වෙමි..” යනුවෙන් එහි සඳහන්.