කැනඩා රටේ රැකියා සඳහා යවන බව පවසා පුද්ගලයන් හතළිස් දෙනෙකුගෙන් පමණ කෝටි පහකට ආසන්න මුදලක් වංචා සහගතව ලබාගත් බව කියන සිද්ධියක් සම්බන්ධයෙන් රක්ෂිත බන්ධනාගාරගත කර සිටි වෛද්යවරයකු ඇප මත මුදා හරින ලෙස කොළඹ ප්රධාන මහේස්ත්රාත් තිළිණ ගමගේ ඊයේ (18) නියෝග කර තිබෙනවා.
මිනුවන්ගොඩ ප්රදේශයේ පදිංචිකරුවකු බව කියන ආනන්ද වෛද්යරත්න නැමැත්තෙකු එසේ ඇපමත මුදා හැර තිබුණා.
කොළඹ වංචා විමර්ශනය අංශය මගින් සැකකාර වෛද්යවරයා අත්අඩංගුවට ගෙන අධිකරණයට ඉදිරිපත් කිරීමෙන් අනතුරුව එසේ රක්ෂිත බන්ධනාගාර ගත කර තිබෙනවා.
ජා ඇල ප්රදේශයේ පදිංචි ශ්රියානි මනම්පේරි නැමැති නීතිඥවරියක්ද මෙම සිද්ධිය සම්බන්ධයෙන් අත්අඩංගුවට ගෙන අධිකරණයට ඉදිරිපත් කර තිබූ අතර අදාල නීතිඥවරියට පෙර නඩු වාරයේදී අධිකරණයෙන් ඇප නියම කෙරුණා.
මෙම සිද්ධියේ ප්රධාන සැකකරු බව කියන වෛද්යවරයා අදාළ නීතිඥවරියව ඔහුගේ නියෝජිතවරියක් වශයෙන් පත් කරගෙන තිබී ඇති බවත් ඔහු එම නීතිඥවරිය වෙත පුද්ගලයන් යොමු කිරීමෙන් අනතුරුව සැකකාර නීතිඥවරිය පැමිණිලිකරුවන් එක් අයකුගෙන් රුපියල් ලක්ෂ 10 බැගින් ලබාගෙන කෝටි පහකට ආසන්න මුදලක් වංචා කර ඇති බවට කරුණු හෙළිවී ඇති බවද ස්ථානාධිපතිවරයා අධිකරණයට දන්වා තිබුණා.
කැනඩා රටට යවන බව පවසා පුද්ගලයන්ගෙන් මුදල් ලබාගෙන ඇති නමුත් ඔවුන් එසේ රැකියා සඳහා යවා නොමැති බවත් ඒ සම්බන්ධයෙන් මේ වන විට පැමිණිලි හතළිහක් පමණ තම අංශය වෙත ලැබී ඇති බවත් සිද්ධිය සම්බන්ධයෙන් වැඩිදුරටත් කරුණු කොළඹ සංඛ්යාව විමර්ශන අංශය විසින් අධිකරණයට දන්වා තිබෙනවා.
