කටුනායක ගුවන්තොටුපොළ පොලිස් අත්අඩංගුවේ සිටිය දී පළාගිය අපරාධ කල්ලි සාමාජිකයෙක් වන “බුරුමූණා” නැමැත්තාට නවාතැන් පහසුකම් දුන් යුවලක් පොලිස් විශේෂ කාර්ය බලකාය විසින් අත්අඩංගුවට ගෙන තිබෙනවා.
නුවරඑළිය ප්රදේශයේ දී මෙම අඹුසැමි යුවළ අත්අඩංගුවට ගෙන ඇති බවයි වාර්තා වුණේ.
සැකකාර යුවළ නුවරඑළිය ප්රදේශයට පළාගිය තිරෝද රථය ද මේ වන විට පොලිස් භාරයට ගෙන ඇති අතර, අත්අඩංගුවට ගත් සැකකරු නාවික හමුදා සෙබලෙක් බවට තොරතුරු වාර්තා වනවා.
මෙම යුවළ මිල්ලනිය, මල්වත්ත පාර ප්රදේශයේ පදිංචිකරුවන් බවයි අනාවරණය වී ඇත්තේ.
හංවැල්ල ප්රදේශයේ ආපනශාලා හිමිකරුවෙකුට පසුගිය දෙසැම්බර් 18 වන දින වෙඩිතබා ඝාතනය කිරීම සම්බන්ධයෙන් අවශ්යවකර සිටි “බුරු මූනා” නැමැත්තා ඝාතනයෙන් පසු සැඟව සිටි ඇත්තේ සැකකාර අඹුසැමි යුවළ පදිංචිව සිටි මිල්ලනිය, මල්වත්ත පාරේ පිහිටි නිවස තුළයි.
“බුරුමූණා” නැමැත්තා පසුගිය 24 වනදා මෙම සැකකරු සමඟ කටුනායක ගුවන්තොටුපල වෙත ගොස් ව්යාජ නමකින් ඩුබායි බලා යාමට උත්සාහ කිරීමේ දී අත්අඩංගුවට පත් වුණා.
මොහු අත්අඩංගුවට පත්වීමෙන් පසු සැකකාර නාවික හමුදා සෙබලා ඔහුගේ බිරිඳ සමඟ මිල්ලනිය, මල්වත්ත පාර නිවසින් අතුරුදන්ව තිබෙනවා.
