ලොව ජනප්රිය අරක්කැමියෙකු වන ‘සෝල්ට් බේ’ නැමැත්තා ලෝක කුසලාන අවසන් තරගයෙන් පසු ක්රීඩා පිටිය තුළට පැමිණියේ කෙසේදැයි යන්න පිළිබඳව ජාත්යන්තර පාපන්දු කවුන්සිලය මේ වනවිට විමර්ශනයක් ආරම්භ කර තිබෙනවා.
සුප්රසිද්ධ මස් වෙළෙන්දෙකු සහ අරක්කැමියෙකු වන තුර්කි ජාතික ‘සෝල්ට් බේ’ නැමැති මෙම පුද්ගලයා FIFA ලෝක කුසලාන අවසන් මහා තරගය ආර්ජන්ටිනාව ජය ගැනීමත් සමඟ පිටිය තුළට පැමිණ එහි හැසිරෙන අයුරු දැක්වෙන දර්ශන සහ ඡායාරූප පසුගිය දින කිහිපයේදීම සමාජ මාධ්යයේ සංසරණය වුණා.
එලෙස පිටිය තුළට ඇතුළු වී සිටි ඔහු එහිදී තම වෙළඳ ලකුණ ප්රදර්ශනය කිරීම සඳහා පාපන්දු ලෝක කුසලානය ආර්ජන්ටිනා ක්රීඩකයෙකුගේ දරුවෙකුගේ අතින් උදුරා ගන්නා ආකාරය බොහෝ දෙනෙකුගේ අවධානයට ලක්වූ සිදුවීමක් වුණා.
කෙසේ වෙතත් එම සිදුවීම බොහෝ දෙනෙක් පුළුල් ලෙස හෙළා දැක ඇති බවයි විදෙස් මාධ්ය වාර්තා කර තිබුණේ.
එහිදී ‘සෝල්ට් බේ’ FIFA VIP අවසර පත්රයක් පැළඳ සිටි අතර, ඔහු කුසලානය අල්ලාගෙන, එය සිපගෙන තම හිසට උඩින් තබාගෙන සිටින අයුරු කැමරා ශිල්පීන්ගේ කැමරා කාචවල සටහන්ව තිබුණා.
කෙසේ වෙතත් FIFA නීති රීතිවලට අනුව ලෝක කුසලානය ස්පර්ශ කළ හැක්කේ හිටපු ජයග්රාහකයින්, වත්මන් ජයග්රාහකයින් සහ රාජ්ය නායකයින් ඇතුළු තෝරාගත් ඉතා සුළු පිරිසකට පමණයි
එවැනි තත්ත්වයක් තුළ ‘සෝල්ට් බේ’ නැමැති මෙම අරක්කැමියා ලෝක කුසලාන අවසන් මහා තරගය පැවති ක්රීඩා පිටියට පැමිණ කුසලානය ස්පර්ශ කර එය සමඟ ඡායාරූප ලබාගත්තේ කෙසේ ද යන්න පිළිබදව විමර්ශනයක් මේ වනවිටත් ආරම්භ කර තිබෙනවා.
