මේ දිනවල කොරෝනා වැලදුණ රෝගියෙක් කියන්නේ කවුරුත් බයවන ලගටවත් යන්න බය හිතෙන කාරණයක්. කොරෝනා රෝගය වැලදුණ කෙනකු රැකබලා ගැනීමට තම සහෝදරයන්වත් ඉදිරිපත් වීමට බියවන සමාජ වට පිටාවක් තුල තමාගේ හොඳම මිතුරිය තම නිවසේ දින පහක කාලයක් රඳවා තබාගෙන ඇයට සියලු සත්කාර සිදුකළ දියණියක් පිළිබඳව ගාල්ල රිපන් බාලිකා විද්යාලයෙන් අපට වාර්තා වුණා. මේ පුංචි දැරිය ගාල්ල, කලේගාන පදිංචි ගාල්ල රිපන් බාලිකා විද්යාලයේ හත්වන වසරේ ඉගෙනුම ලබන කේ. එච්. හංසනි යශෝධා නමැති කුඩා දැරියයි. ඇගේ එකම පංතියේ හොදම මිතුරිය වන ගාල්ල සපුමල් පෙදෙසේ පදිංචි එච්. එන්. විශ්මි විහංගාද යශෝධා කුඩා දැරියයි.
විශ්මී විහංගා දියණියගේ මවට හදිසි සැත්කමක් සිදු කිරීම සඳහා ඇය ගාල්ල නගරයේ පෞද්ගලික රෝහලකට ඇතුළත් කිරීමට සිදුවිය. එහිදී ගාල්ල රේවත පිරිවෙනේ ගුරුවරයකු වන ඇයගේ පියා තමන්ගේ එකම දරුවා වන විශ්මි විහංගා නතර කර යන්නේ ඇයගේ හොඳම මිතුරිය වන හංසනී යසෝධාගේ නිවෙසේය. විශ්මී විහංගා දියණියගේ මවට සැත්කමට පෙර සිදුකළ රැපිඩ් ඇන්ටිජන් පරීක්ෂණයේදී එම මව කොරෝනා ආසාදිතයකු බව හඳුනා ගැනුණු අතර, අනතුරුව ඇයගේ පියාටද සිදුකළ පරීක්ෂණයේදී ඔහුද කොරෝනා ආසාදිතයකු බව තහවුරු කරගෙන තිබිණි. ඔවුන් දෙදෙනාම ප්රතිකාර මධ්යස්ථාන වෙත යොමුකර අනතුරුව විශ්මී විහංකා දියණියට සිදුකළ පරීක්ෂණයේදී ඇයටද කොරෝනා රෝගය වැළඳී ඇති බව තහවුරු විය. ඇය ප්රතිකාර මධ්යස්ථානයක් වෙත රැගෙන යන විට දින පහක කාලයක් ඇය හංසනී යසෝධා දියණියගේ නිවෙසේ ගතකර තිබිණි. හංසනී යසෝධා දියණියත් ඇයගේ මව, පියා සහ සොහොයුරන් සියලු සෞඛ්ය ආරක්ෂිත ක්රමවේද අනුගමනය කරමින් කටයුතු කිරීම නිසා ඔවුන් කිසිවකුත් කොරෝනා වසංගතයට ලක් නොවිණි.
මේ පුංචි හංසනී යසෝධා දියණිය සිදුකළ මේ උතුම් ක්රියාව අගය කරමින් ගාල්ල රිපන් බාලිකා විද්යාලයේදී විශේෂ ඇගැයීමේ උළෙලක් ද සංවිධානය විය. බාලදක්ෂිකා සංගමය මගින් වසරක් පුරාවට අවශ්ය සියලු පාසල් උපකරණ ඇයට පරිත්යාග කෙරිණි.
wpDiscuz
