2023 උසස් පෙළ විභාගයට පෙනී සිටින සිසුන් සඳහා අනිවාර්ය පැමිණීමේ අනුපාතය අධ්‍යාපන අමාත්‍යාංශය විසින් සංශෝධනය කර තිබෙනවා.
අද පාර්ලිමේන්තුවේදී විශේෂ ප්‍රකාශයක් කරමින් අමාත්‍ය සුසිල් ප්‍රේමජයන්ත කියාසිටියේ විභාගයට පෙනී සිටින සිසුන්ට තම අයදුම්පත් ලබා ගැනීමට අවශ්‍ය වන්නේ අවම වශයෙන් 40% පැමිණීමේ අනුපාතයක් පමණක් බවයි.
කොවිඩ් 19 වසංගතය හේතුවෙන් අධ්‍යාපන ක්ෂේත්‍රයට එල්ල වූ බලපෑම් සහ රටේ ආර්ථික අර්බුදය හේතුවෙන් මෙම තීරණය ගෙන ඇති බව අමාත්‍යවරයා අනාවරණය කළා.
අර්බුද හේතුවෙන් සිසුන් කිහිප දෙනෙකුට ඔවුන්ගේ අධ්‍යයන කටයුතුවලට සහභාගී වීමට නොහැකි වීම ඇතුළු කරුණු සැලකිල්ලට ගෙන විභාග අයදුම්පත්‍රය සඳහා පැමිණීමේ අනුපාතය සංශෝධනය කළ බවයි ඔහු සඳහන් කළේ.
2023 අධ්‍යයන පොදු සහතික පත්‍ර උසස් පෙළ විභාගය සඳහා සංශෝධිත අනිවාර්ය පැමිණීමේ අනුපාතය පිළිබඳ චක්‍රලේඛයක් සියලුම අධ්‍යාපන නිලධාරීන් වෙත නිකුත් කර ඇති බව ද අමාත්‍යවරයා ප්‍රකාශ කළා.
කෙසේවෙතත් අනිවාර්ය පැමිණීමේ අනුපාතය අවම වශයෙන් 40% දක්වා සංශෝධනය කර ඇත්තේ මේ වසර සඳහා පමණක් බවයි ඔහු කියාසිටියේ.
2023 උසස් පෙළ විභාගය 2023 නොවැම්බර් 27 සිට දෙසැම්බර් 21 දක්වා පැවැත් වීමට නියමිතයි.
