පොදු ව්යවහාරයේ පෞද්ගලික බස් රථ සේවකයින් ගැන ජනතාව තුළ ඇත්තේ ප්රසාද හැඟීමක් නොවෙයි.
නමුත් අපි මේ කියන්න හදන්නේ නවම් පුර පසලොස්වක පොහොය නිමිති කර ගනිමින් සද් කාර්යයක නිරත වූ පෞද්ගලික බස් රථ හිමිකරුවන් සහ සේවකයින් පිරිසක් ගැනයි.
දවස් 365 පුරාම එකිනෙකා හා බැණ අඩගහ ගනිමින් කොළඹ පාරවල් පුරා රේස් පදින මාර්ග අංක 138 හෝමාගම – පිටකොටුව පෞද්ගලික බස් රථ හිමිකරුවන් සහ ඒවායේ සේවකයින් සද් කාර්යයට එක් වුණා.
ඒ හෝමාගම හා අවට බැතිමතුන් 600 දෙනෙකු වෙනුවෙන් අනුරාධපුර වන්දනා චාරිකාවක් සංවිධානය කරමින්.
ආර්ථික අර්බුදයේ කරවටක් ගිලී සිටින මෙරට බොහෝ දෙනෙකුට වන්දනා ගමනක් යෑම අද කාලයේ පහසු නැහැ.
එවන් පසුබිමකයි පෞද්ගලික බස් හිමිකරුවන් සහ සේවකයින් මෙම වැඩසටහන සංවිධාන කර තිබුණේ.
මෙම පිරිසගෙන් කිසිදු මුදලක් අය නොකිරීම මෙහි ඇති විශේෂත්වයක්.
බස් රථ 10ක් අද අලුයම මෙම වන්දනා ගමන ආරම්භ කළා.
ඔවුන් අද දිනය පුරා අනුරාධපුර පූජා භූමියේ රැඳී සිටිමින් අටවිසි බෝධි පූජා පින්කම් ඇතුළු පිංකම් රැසක නිරත වීමට නියමිතයි.
පූජ්ය මීගහපැලැස්සේ විජිතධම්ම හිමි – විහාරාධිපති – හෝමාගම මහකටුවාන ශාසන වර්ධනාරාම විහාරය බැතිමතුන් ලබන මස සිට සෑම පොහෝ දිනකම බස් රථ දෙක බැගින් යොදාගෙන මෙලෙස නොමිලේ බැතිමතුන් අනුරාධපුර වන්දනාවේ කැඳවාගෙන යෑමට මේ වන විටත් සැලසුම් කර ඇතැයි සංවිධායකයින් පැවසුවා.
