ශ්රී ලංකා මහජන උපයෝගිතා කොමිෂන් සභාව හෙට සිට ක්රියාත්මක වන පරිදි සමස්ත විදුලි බිල සියයට 14.2කින් අඩු කිරීමට අනුමැතිය ලබා දී තිබෙනවා.
මසකට ඒකක 0-30 කාණ්ඩයේ අඩු විදුලි පාරිභෝගිකයින් සඳහා හෙට (ජුලි 01) සිට සියයට 65ක විදුලි ගාස්තු අඩුවීමක් හිමි වන බවයි මහජන උපයෝගිතා කොමිසම පවසන්නේ.
ඒකක 31-60 කාණ්ඩය යටතේ විදුලිය භාවිතා කරන්නන් මත සියයට 51.5 ක අඩුවීමක් සිදු වී ඇති අතර ඒකක 61-90 කාණ්ඩය යටතේ විදුලිය භාවිතා කරන්නන් සඳහා සියයට 24.5 ක ගාස්තු අඩු වීමක් සිදුවී තිබෙනවා.
ඒකක 91ත් 120ත් කාණ්ඩය සදහා ඒකකය රුපියල් 42 සිට රුපියල් 35 දක්වා අඩු කර ඇති අතර එහි මාසික ගාස්තුව අඩු කර ඇත්තේ රුපියල් 1500 සිට රුපියල් 1000 දක්වායි.
හෝටල් අංශයේ විදුලි බිලෙහි සියයට 26.3ක අඩුවීමක් පවතින අතර කර්මාන්ත කාණ්ඩයේ සියයට 9ක අඩුවීමක් සිදුවී ඇති බවයි මහජන උපයෝගීතා කොමිසම සඳහන් කළේ.
වාණිජ ගොඩනැගිලිවල විදුලි බිල සියයට 5 කින් අඩු කර ඈති අතර ආගමික අරමුණු කාණ්ඩයේ සමස්ත අඩු කිරීම සියයට 16ක්.
මේ අතර, සියලුම සහාධිපත්ය දේපළවල පදිංචිකරුවන්ට අදාළ ගාස්තු කාණ්ඩවලට අනුව බිල්පත් අය කිරීම සහතික කිරීම සඳහා කඩිනම් පියවර ගන්නා ලෙස මහජන උපයෝගිතා කොමිෂන් සභාව ලංවිම සහ ලෙකෝ වෙතින් ඉල්ලා තිබෙනවා.
වීදි ලාම්පු පරිභෝජනය මීටර හෝ ඇස්තමේන්තු කළ යුතු අතර, පළාත් පාලන අධිකාරියට හෝ මාර්ග අධිකාරියට බිල් ගෙවිය යුතුයි.
පාරිභෝගිකයන්ගෙන් ලබාගත් ආරක්ෂිත තැන්පතු ආයෝජනය කළ යුතු අතර ආයෝජනයේ ප්රතිලාභයෙන් පොලිය ගෙවිය යුතු වනවා.
විදුලිය සැපයීම සඳහා ලබා ගන්නා ඕනෑම ආරක්ෂිත තැන්පතුවක පොළිය සියලුම පාරිභෝගිකයන්ගේ මාසික බිල්පතෙන් ගෙවීම හෝ අඩු කිරීම සිදු කෙරෙනු ඇති.
2023 ජුලි 1 වැනිදා සිට ක්රියාත්මක විදුලි ගාස්තු සංශෝධනයට අදාල කොන්දේසි
1. සහාධිපත්ය දේපල (නිවාස සංකීර්ණ) වල පාරිභෝගිකයින් ට අදාල වන ගාස්තු කාණ්ඩයට යටත් කර ගාස්තු අයකිරීම සදහා ලංකා විදුලිබල මණ්ඩලය (ලංවිම) හා ලංකා විදුලි පුද්ගලික සමාගම (ලෙකො) කඩිනමින් පියවර ගත යුතු වේ. මෙම නිවාස සංකීර්ණ වල පොදු ස්ථාන සදහා වැය වන විදුලිය සහ වෙනත් නඩත්තු වියදම් පියවාගැනීම සදහා ශ්රී ලංකා විදුලි බල පනතේ 18 වන වගන්තිය යටතේ සේවා ගාස්තු ක්රමයක් හදුන්වාදීමට ලංවිම/ලෙකො අදාල නිවාස සංකීර්ණ වල කලමණාකරන සංස්ථා සමග ගිවිසුම් ගත වීමට පුළුවන
2. වීථී ලාම්පු සදහා පරිභෝජනය කෙරෙන විදුලිය මනුගත කර/ඇස්තමේන්තු කර බිල්පත් නිකුත් කර අදාල පලාත් පාලන ආයතන/මාර්ග සංවර්ධන අධිකාරියෙන් අදාල ගාස්තු අයකර ගැනීම සදහා පියවර ගත යුතු ය
3. පාරිභෝගිකයින්ගෙන් ලබාගත් ඇප තැන්පතු ආයෝජනය කර ඉන් ලැබෙන ප්රතිලාභ වලින් පාරිභෝගිකයින්ට පොලිය ගෙවීමට පියවර ගත යුතු වේ
4. පාරිභෝගික ඇප තැන්පතු සදහා ගෙවන පොලිය අදාල පාරිභෝගිකයාගේ මාසික බිල්පතෙන් අඩු කර ගැනීම සදහා පියවර ගත යුතු වේ
5. ඉන්ධන හා ගල් අගුරු සැපයීම් වලට අදාලව ලංකා ඛණිජ තෙල් නීතිගත සංස්ථාව හා ලංකා කෝල් සමාගම සමග ගිවිසුම් ක්රියාත්මක කිරීමට ලංවිම පියවර ගත යුතු ය
6. ලංවිම විදුලි බලාගාර සහ ලංවිම සම්ප්රේශණ අංශය අතර විදුලිය මිලදී ගැනීමේ ගිවිසුම් ක්රියාවට නැගිය යුතු අතර ලංවිම සම්ප්රේශන අංශය හා බෙදාහැරීම් අංශ අතර විදුලිය අලෙවිය සදහා ගිවිසුම් ක්රියාවට නැගිය යුතු ය.
7. දැනට බලපත්ර රහිතව ක්රියාත්මක ලංවිම බලාගාර සදහා මාස 2ක් ඇතුළත බලපත්ර ලබාගත යුතු ය
8. පුනර්ජනනීය විදුලි බලාගාර (වහල මත සවිකරන සුර්ය බලාගාර ද ඇතුළුව) වලින් විදුලිය මිලදී ගැනීමේදී කල යුතු ගෙවීම් කඩිනමින් ගෙවීමට පියවර ගත යුතු ය.
9. මෙම තීන්දුවේ දිනයේ සිට මාස දෙකක් ඇතුළත ලංවිම විසින් තොග සැපයුම් සම්ප්රේශණ ගිණුම ක්රියාවට නැගිය යුතු ය.
10. නෙට් මීටරින් සහ නෙට් එකවුන්ටින් ක්රම යටතේ වහල මත සවිකල සුර්ය බල පද්ධති සහිත විදුලි පාරිභෝගිකයින්ගෙන් මාසික ස්ථාවර ගාස්තු අයකිරීමේ දී ඔවුන් විසින් ආනයනය කල ශුද්ධ විදුලි ප්රමාණය මත මාසික ගාස්තුව අය කල යුතු ය. ඔවුන් විසින් ශුද්ධ අපනයනයක් කර ඇත්නම් මාසික ගාස්තුව තීරණය කල යුත්තේ මාසික විදුලි පරිභෝජනය 0 ලෙස පදනම් කරගෙන ය
11. ආගමික ස්ථාන සදහා වහල මත සවිකරන සුර්ය බල පද්ධති සවිකිරීමේ ක්රියාදාමය ලංවිම සහ ලෙකො විසින් කඩිනම් කල යුතු අතර එහි ප්රගතිය පිළිබද වාර්තාවක් මෙම තීන්දුවේ දිනයේ සිට මාස දෙකක් ඇතුළත කොමිෂන් සභාවට ඉදිරිපත් කල යුතු ය.
සටහන-ඉහත කොන්දේසී වලින් 1, 2, 4, 5, 6, 8 සහ 9 යන කොන්දේසී පසුගිය ගාස්තු සංශෝධනයේදී ද පනවා ඇති බව අවධාරණය කෙරේ.
