හිමිකරුවෙක් නොමැති සුදු පැහැති මෝටර් රථයක් තලාහේන ප්‍රදේශයේ පෞද්ගලික බැංකුවක් ඉදිරිපිට දමා ගොස් තිබිය දී පොලිසිය විසින් සොයාගෙන තිබෙනවා.
අද (05) අලුයම තුනට පමණ අදාළ මෝටර් රථය පෞද්ගලික බැංකුව ඉදිරි පිට නවතා තිබෙනු දැක ඇති බැංකුවේ ආරක්ෂක නිලධාරීන්, එය උදෑසනවන විටත් ඉවත්කර නොගැනීම හේතුවෙන් ඒ පිළිබඳව පොලිසියට දැනුම්දීමටයි කටයුතු කර ඇත්තේ.
පසුව තලංගම පොලිසියේ නිලධාරීන්, බෝම්බ නිෂ්ක්‍රීය අංශ නිලධාරීන් සහ පොලිස් විශේෂ කාර්ය බළකායේ නිලධාරීන් එහි පැමිණ අදාළ මෝටර් රථය දැඩි පරීක්ෂාවකට ලක්කර ඇති බවයි දැනගන්නට ලැබුණේ.
අනතුරුව රථය තලංගම පොලිස් ස්ථානය වෙත රැගෙන යාමට කටයුතු කර ඇති අතර, එය 2023 වර්ෂයේ ආදායම් බලපත්‍ර ලබාගත් මෝටර් රථයක් බවයි සිදුකළ පරීක්ෂා කිරීම්වල දී අනාවරණය වී ඇත්තේ.
මෙම මෝටර් රථය කිසියම් අපරාධයක් සඳහා සම්බන්ධ රථයක් ද යන්න පිළිබඳව පොලිසිය විමර්ශන අරඹා ඇති අතර, බැංකුව අසළ පිහිටි ආරක්ෂිත කැමරාවල දර්ශන ඔස්සේ ඉදිරි විමර්ශන කටයුතු සිදුකරන බවයි පොලිසිය සඳහන් කළේ.
