පාසල් හා ක්‍රීඩා සමාජ අතර බේදා දීම සඳහා 2015 වසරේදී ලංකා සතොස හරහා ආනයනය කරන ලද රුපියල් මිලියන 53ක් වටිනා කැරම් බොඩ් 14000ක් සහ දාම් බොඩ් 14000ක් නිසි ක්‍රමවේදය අනුගමනය නොකර ගෙන්වා වෙනත් කටයුතු සඳහා යොදා ගැනීම සම්බන්ධයෙන් චෝදනා යටතේ හිටපු ක්‍රීඩා අමාත්‍ය මහින්දානන්ද අලුත්ගමගේ මහතා සහ හිටපු වෙළඳ අමාත්‍ය නලින් ප්‍රනාන්දු මහතාට එරෙහිව පවරා ඇති නඩුව විත්තියේ සාක්ෂි කැඳවීමකින් තොරව අවසන් කරන ලෙස කළ ඉල්ලිම ප්‍රතික්ෂේප කළ බස්නාහිර පාළාත් ස්ථිර ත්‍රිපුද්ගල විනිසුරු මඩුල්ල විත්තියේ සාක්ෂි විභාගය ලබන දෙසැම්බර් 02 වැනිදා කැඳවීමට නියෝග කර තිබෙනවා.
සභාපති විනිසුරු ප්‍රදිප් හෙට්ටිආරච්චි, මහෙශ් විරමන්, ප්‍රදීප් අබේරත්න යන මහත්වරුන්ගෙන් සමන්විත ත්‍රිපුද්ගල මහාධිකරණ විනිසුරු මඩුල්ල හමුවේ අද (04) නඩුව කැඳවනු ලැබුවා.
එහිදී මෙම නඩුවේ විත්තියේ සාක්ෂි විභාගය ලබන දෙසැම්බර් 2 වැනිදා ආරම්භ කිරිමට දින නියම කර තිබෙනවා.
සිය සේවා දායකයන්ට එරෙහිව ප්‍රමාණවත් සාක්ෂි නොමැති බවට තීරණය කර අපරාධ නඩු විධාන සංග්‍රහයේ 200(1) වගන්තිය යටතේ විත්තියේ සාක්ෂි කැඳවිමකින් තොරව ඔවුන් නිදොස් කොට නිදහස් කරන ලෙස ජනාධිපති නීතිඥ අනිල් සිල්වා මහතා සහ ජ්‍යෙෂ්ඨ නීතිඥ කංචන රත්වත්තේ මහතා පැමිණිල්ලේ සාක්ෂි විභාගයේදි ඉල්ලා තිබුණා.
එම ඉල්ලිම සම්බන්ධයෙන් අල්ලස් හෝ දුෂණ කොමිසමේ සහාකාර අධ්‍යක්ෂ ජනරාල් අනුත්තරා ජයසිංහ මහත්මිය විරුද්ධත්වය දැක්වු අතර එම මහත්මිය සඳහන් කළේ විත්ති වාචිකය කැඳවීම සඳහා ප්‍රමාණවත් සාක්ෂි තිබෙන බවයි.
