සොරාගත් ත්‍රී රෝද රථ වලින් ගොස් කාන්තාවන්ගේ රන්මාල සහ අත් බැග් කොල්ලකෑමේ යෙදුණු පුද්ගලයකු හොරේතුඩුව පාලම අසලදී හොරයින් මත්කුඩු සමඟ අත්අඩංගුවට ගත් බව පානදුර පොලිසිය පවසයි.
සැකකරුගෙන් සිදු කළ ප්‍රශ්න කිරීමේදී එලෙස සොරා ගෙන තිබූ ත්‍රී රෝද රථ දෙකක්, රන්මාල තුනක්,හොරයින් මත්කුඩු ග්‍රෑම් 6 මිලිග්‍රෑම් 10 ක් පොලිස් භාරයට ගෙන තිබෙනවා.
ඉකුත් දින කීපය තුළ පානදුර උතුර, අලුබෝමුල්ල හා වාද්දුව ප්‍රදේශවල ත්‍රිරෝද රථ වලින් සැරිසරමින් මහ මග ගමන් ගන්නා කාන්තාවන්ගේ ගෙල බැඳි රන් මාල සහ අත්බෑග් කොල්ල කෑමේ නිරත පුද්ගලයන් දෙදෙනකු සම්බන්ධයෙන් පානදුර උතුරු පොලිසියට ලද තොරතුරකට අනුව සැකකරු ත්‍රී රෝද රථයකින් ගමන් කරමින් සිටියදී අත්අඩංගුවට ගත් බව පොලිසිය කියයි.
එම සැකකරුගෙන් සිදු කළ ප්‍රශ්න කිරීමේදී දෙහිවල ප්‍රදේශයෙන් ත්‍රී රෝද රථ දෙකක් සොරා ගැනීම සම්බන්ධයෙන් තොරතුරු අනාවරණය වූ බව පොලිස් නිලධාරියකු පැවැසීය.
කොල්ලකෑමට සම්බන්ධ තවත් පුද්ගලයෙකු අත්අඩංගුවට ගැනීම සඳහා පොලීසිය පරීක්ෂණ පවත්වයි .
අත්අඩංගුවට ගත් සැකකරු වයස අවුරුදු තිහක් වන මොරටුමුල්ල පදිංචිකරුවෙක්.
සැකකරු අධිකරණය වෙත ඉදිරිපත් කිරීමට නියමිතය.
