ඩුබායි සිට මෙරටට පැමිණි මගීන් දෙදෙනකු සතුව තිබී මැන්චෙස්ටර් වර්ගයේ සිගරට් 20,200ක හා 21,200ක ප්‍රමාණයක් රේගු භාරයට ගැනීමට කටුනායක ගුවන්තොටුපල රාජකාරියේ නියුතු රේගු නිලධාරීන් සමත් වුණා.
අප ගුවන් තොටුපොළ වාර්තාකරු සඳහන් කළේ; මොවුන් ඊයේ (25) පස්වරුවේ මෙරටට පැමිණියේ FZ 549 දරන ගුවන් යානයෙන් බවයි.
මෙම සැකකරුවන් පොළොන්නරුව හා තලවතුගොඩ ප්‍රදේශවල පදිංචිකරුවන් වන අතර මෙම සිගරට් තොගයේ මුළු වටිනාකම රු. 4,175,000ක් පමණ වන බවත් හෙළි ව තිබෙනවා.
යම් හෙයකින් මෙම සිගරට් තොගය රේගු භාරයට නොගෙන වෙළෙඳපොළ වෙත නිදහස් වූයේ නම් රජයට අහිමි වන ආදායම රු. 3,200,000ක් පමණ වන බවයි හෙළි ව ඇත්තේ.
1999 අංක 8 දරණ දුම්කොළ බදු පනත හා 2004 අංක 9 දරණ සංශෝධිත දුම්කොළ බදු පනතට අනුව මෙරටට නිසි බලපත්‍රයක් නොමැති ව දුම්කොල අඩංගු දුම්වැටි හෝ එහි නිෂ්පාදන ගෙන ඒම තහනම් වන අතර නීතිවිරෝධී ව රැගෙන ආ මෙම සිගරට් තොගය රේගු ආඥා පනත යටතේ රාජසන්තක කිරීමකට කටයුතු කර තිබෙනවා.
