මත් පැන් බෝතල්වල අලවන ව්‍යාජ ස්ටිකර් පරීක්ෂා කිරීමට ගැනීමෙන් පසු සුරාබදු දෙපාර්තමේන්තුවේ මාසික ආදායම රුපියල් බිලියනයකින් වැඩිවී ඇති බව එම දෙපාර්තමේන්තුවේ නිලධාරීන් ජාතික ආර්ථිකය හා භෞතික සැලසුම් පිළිබඳ ආංශික අධීක්ෂණ කාරක සභාවට අනාවරණය කර තිබෙනවා.
මෙම තොරතුරු අනාවරණය වූයේ ජාතික ආර්ථිකය හා භෞතික සැලසුම් පිළිබඳ ආංශික අධීක්ෂණ කාරක සභාව පාර්ලිමේන්තු මන්ත්‍රී මහින්දානන්ද අලුත්ගමගේගේ සභාපතීත්වයෙන් පාර්ලිමේන්තුවේදී රැස් වූ අවස්ථාවේදීයි.
මෙහිදී ජාතික ආර්ථිකය හා භෞතික සැලසුම් පිළිබඳ ආංශික අධීක්ෂණ කාරක සභාව විසින් ජනාධිපතිවරයාට ලබාදුන් වාර්තාවේ සඳහන් කරුණු පිළිබඳ සාකච්ඡා කිරීමට සුරාබදු දෙපාර්තමේන්තුව, දේශීය ආදායම් දෙපාර්තමේන්තුව සහ ශ්‍රී ලංකා රේගුව මෙම කාරක සභාවට කැඳවා තිබුණා.
මේ අනුව සුරාබදු පනත සංශෝධනය සම්බන්ධයෙන් ද මෙහිදී කමිටුව විමසනු ලැබුවා. එසේම සුරාබදු දෙපාර්තමේන්තුව මේ වන විට වැඩි කරගෙන ඇති ආදායම පවත්වාගෙන යාමේ අවශ්‍යතාව සහ අහඹු ලෙස වැටලීම් ඉදිරියටද කරගෙන යාම ව්‍යාජ ස්ටිකර් මත් පැන් බෝතල්වල ඇළවීම තවදුරටත් අවම කිරීමට හේතු වන බව ද මෙහිදී කමිටුව පෙන්වා දෙනු ලැබුවා.
එසේම RAMIS පද්ධතියේ වර්තමාන ක්‍රියාකාරීත්වය පිළිබඳව දේශීය ආදායම් දෙපාර්තමේන්තුවෙන් විමසීමද මෙහිදී සිදු කෙරුණා. මේ අනුව මෙම දත්ත පද්ධතිය අනෙකුත් රාජ්‍ය ආයතන සමග සම්බන්ධ කිරීමේ වර්තමාන තත්ත්වය පිළිබඳව ද මෙහිදී කමිටුව විසින් පරීක්ෂා කර තිබෙනවා. මේ අනුව පවතින අඩුපාඩු මගහරිමින් 2024 ජනවාරි මස වන විට මෙම දත්ත පද්ධතිය ක්‍රියාකාරී තත්ත්වයට පත් කරන බව පැමිණි නිලධාරීන් සඳහන් කළා.
තව ද බදු ලිපිගොනු සංඛ්‍යාව දැනට ලක්ෂ 7ක් පමණ වන බවත් එය ඉදිරියේදී ලක්ෂ 10ක් දක්වා වැඩිකිරීමට බලාපොරොත්තු වන බවත් දේශීය ආදායම් දෙපාර්තමේන්තුව මෙහිදී ප්‍රකාශ කර තිබෙනවා.
මීට අමතරව ආදායම් බදු නිවැරදිව ගෙවන පාර්ශ්ව ඇගයීමේ ක්‍රමවේදයක් සකස් කිරීම කෙරෙහි අවධානය යොමු කරන ලෙසටයි කමිටුව විසින් නිලධාරීන්ට උපදෙස් ලබා දෙනු ලැබුවා.
තවද රේගුව සම්බන්ධ නීති සංශෝධනය කිරීම මගින් අපේක්ෂිත බදු ආදායම ඉක්මවූ බදු ප්‍රමාණයකට රේගුවට ළඟා විය හැකි බව ද මෙහිදී කමිටුව පෙන්වා දී තිබෙනවා. එසේම රේගුව විසින් අය කළ යුතු බදු අය කර ගැනීම වෙනුවෙන් ගන්නා පියවර පිළිබඳවද මෙහිදී දීර්ඝ වශයෙන් සාකච්ඡා කරනු ලැබුවා.
