සුබසාධක ප්රතිලාභ ගෙවීම සඳහා සුදුස්සන් හඳුනාගැනීමේ වැඩසටහනෙහි මේ වන විට ක්රියාත්මක තොරතුරු සමීක්ෂණය හා තොරතුරු තහවුරු කර ගැනීමේ ක්රියාවලිය මගින්, ලැබී ඇති අයැදුම්පත් ලක්ෂ 22කගේ වැඩි ප්රමාණයක තොරතුරු තහවුරු කර ගැනීම අවසන් කර තිබෙනවා.
දිවයින පුරා ප්රාදේශීය ලේකම් කොට්ඨාස 340කින් ලැබුණු අයැදුම්පත් ලක්ෂ 37ක සුබසාධක දීමනා ලබා දීමට සුදුසුකම් පරීක්ෂා කිරීමේ කටයුතු කඩිනමින් සිදු කරන ලෙසටයි ජනාධිපති ලේකම් සමන් ඒකනායක මහතා නිලධාරීන්ට උපදෙස් දී ඇත්තේ.
ජනාධිපති රනිල් වික්රමසිංහ මහතාගේ උපදෙස් මතයි සුබසාධක ප්රතිලාභ ගෙවීම ක්රියාත්මක කරනු ලබන්නේ.
මේ අනුව දැනට තොරතුරු තහවුරු කර අවසන් කර ඇති අයැදුම්පත් අතරින් වැඩිම ප්රමාණයක් මාතර දිස්ත්රික්කයෙන් වන අතර, එය ප්රතිශතයක් ලෙස 82.1% ක්.
පිළිවෙළින් අම්පාර දිස්ත්රික්කයෙන් 78.3%ක්, කළුතර දිස්ත්රික්කයෙන් 74.5%ක්, ගාල්ල දිස්ත්රික්කයෙන් 73.3%ක් සහ අනුරාධපුර දිස්ත්රික්කයෙන් 71.7%ක් වශයෙන් සමස්ත දිවයිනම ආවරණය වන පරිදි අයැදුම්පත් 2,227,888ක තොරතුරු තහවුරු කර ගැනීම සිදුකර තිබෙනවා.
මෙම තොරතුරු සමීක්ෂණ කටයුතු මාර්තු 31 වැනිදායින් අවසන් වන බැවින් කඩිනමින් අදාළ තොරතුරු සමීක්ෂණ කටයුතු සිදු කරන නිලධාරීන් වෙත නිවැරදිව දත්ත ලබා දීමට කටයුතු කරන ලෙසටයි රජය අයැදුම්කරුවන්ගෙන් ඉල්ලීමක් කරන්නේ.
එසේම නියමිත දිනට පෙර නිවැරදි තොරතුරු සැපයීමට අපොහොසත් වන අයැදුම්කරුවන්ට සුබසාධක ප්රතිලාභ අහිමි විය හැකි බව රජය තවදුරටත් අවධාරණය කරනවා.
