සිසුවියක් අපහරණය කර ඝාතනය කළ අයෙකුට බලපිටිය මහාධිකරණයෙන් මරණ දඬුවම

දොළොස් හැවිරිදි දැරියක් අපහරණයට ලක්කර ඝාතනය කළ විත්තිකරුවකුට බලපිටිය මහාධිකරණය විසින් මරණීය දණ්ඩයනය නියම කරයි.

අම්බලන්ගොඩ පොලිස් වසමේ 2008 වසරේ දෙසැම්බර් මස 04 දින තල්ගස්ගොඩ, සුදුවැල්ල ප්‍රදේශයේදී අවුරුදු 12ක පාසල් ශිෂ්‍යාවක් අපහරණයට ලක්කර ඝාතනය කිරීම සම්බන්ධයෙන් බලපිටිය මහාධිකරණයේදී විභාග වූ නඩුවක තීන්දුව ඊයේ (07) ලබා දුන්නා.

එහිදී විත්තිකරුට මනුෂ්‍ය ඝාතනය සම්බන්ධ චෝදනාවට මරණීය දණ්ඩනය බලපිටිය මහාධිකරණ විනිසුරු රුචිර වැලිවත්ත මහතා විසින් නියම කළා.

මෙහිදී විත්තිකරුට එරෙහිව චෝදනා දෙකක් යටතේ මෙම නඩු පවරා තිබූ අතර, පළමු චෝදනාව වූ අපහරණය යටතේ රුපියල් 25,000ක දඩ මුදලක් නියම වූ අතර, ඊට අමතරව වසර පහක අනිවාර්යය බරපතල වැඩ සහිතව සිරදඬුවමක් හා මනුෂ්‍ය ඝාතනය කිරීම යටතේ මරණීය දණ්ඩනය නියම කරනු ලැබුවා.

අම්බලංගොඩ ප්‍රදේශයේ පාසලක 2008 වසරේ හයවන ශ්‍රේණියේ ඉගෙනුම ලැබූ සිසුවියක් වූ සල්ගස්ගොඩ ප්‍රදේශයේ පදිංචි දොළොස් හැවිරිදි දැරියක් පාසලේ ක්‍රීඩා උත්සවයට ගොස් නැවත නිවසට එන අතර තුර තල්ගස්ගොඩ, සුදුවැල්ල ප්‍රදේශයේ දී ඇය පැහැරගෙන කුරුඳු කැලයකට ගෙන ගොස් අපහරණය කර පොල්ලකින් ගසා ඝාතනය කර මළ සිරුර ළිඳකට දමා තිබිය දී සොයා ගැනුණා.

එම අපරාධයේ චූදිතයා වූ තල්ගස්කොඩ ප්‍රදේශයේ පදිංචි නලිඳු සම්පත් නොහොත් ‘පුංචා’ යන අයට එරෙහිව මෙම මරණීය දණ්ඩනය ලබාදෙනු ලැබුවා.

තීන්දුව ප්‍රකාශ කිරීමෙන් අනතුරුව චූදිතයා වැලිකඩ බන්ධනාගාරය වෙත රැගෙන යාමටයි කටයුතු කළේ.