සාදයකට සහභාගීවීම සඳහා හිස කෙස් සකසා ගැනීමට ගිය කාන්තාවකට හිසේ ගැල්වූ ද්‍රව්‍යයන් ආසාත්මික වීම හේතුවෙන් සිය හිස කෙස් සියල්ල ගැල වී ගිය පුවතක් මිනුවන්ගොඩ ප්‍රදේශයෙන් වාර්තා වනවා.
හිස කෙස් ගැලවී යාමේ බරපතළ තත්ත්වයක් ඇති වීම හේතුවෙන් අදාළ කාන්තාව මේ වන විට ගම්පහ මහ රෝහලට ඇතුළත් කර ඇති බවයි තොරතුරු වාර්තා වුණේ.
මිනුවන්ගොඩ, බොරගොඩ වත්ත ප්‍රදේශයේ පදිංචි 35 හැවිරිදි විවාහක කාන්තාවක් මෙම සිදුවීමට මුහුණ දී ඇති බව සඳහන්.
මෙම කාන්තාව සාදයකට සහභාගී වීම සඳහා හිස කෙස් සකසා ගැනීමට මිනුවන්ගොඩ ප්‍රදේශයේ පිහිටි රූපලාවන්‍යාගාරයක් වෙත ගොස් තිබෙනවා.
එහි දී ඇයගේ කොණ්ඩය සැකසීම සඳහා හිස ගල්වන ද්‍රව්‍යයන් කිහිපයක්ම ගැල්වීම සිදුකර ඇති බවයි වාර්තා වන්නේ.
මෙම ආලේපන යෙදීම හේතුවෙන් කාන්තාවගේ හිසේ දැඩි දැවිල්ලක් දැනීමට පටන් ගෙන ඇති අතර, ඒ පිළිබඳව එහි සිටි සේවිකාවන්ට පවසා තිබෙනවා.
එහිදී රූපලාවන්‍යාගාර සේවිකාවන් විසින් අදාළ කාන්තාවගේ හිස සෝදා පිස දැමීමට කටයුතු කර ඇති අතර, පැවති අධික අපහසුතාවය නිසා එම කාන්තාව හිස පිරිමැදීමට පටන් ගෙන ඇති අතර එහිදී ඇයගේ හිසකෙස් සම්පූර්ණයෙන්ම ගැලවී අතට පැමිණ ඇති බවයි වාර්තා වන්නේ.
කෙසේ වෙතත් එම කාන්තාව පවසා ඇත්තේ කොණ්ඩය සැකසීම සඳහා රුපියල් පහළොස්දහසක මුදලක් ද රූපලාවන්‍යාගාරයෙන් ලබාගත් බවයි.
