පේරාදෙණිය රෝහලේ සාමාන්‍ය සැත්කම් අත්හිටුවීමට තීරණයක් ගෙන ඇති බව කිසිදු විටෙක සෞඛ්‍ය අමාත්‍යංශය, ඖෂධ නියාමන රාජ්‍ය අමාත්‍යංශය හෝ වෛද්‍ය සැපයීම් ඒකකය දැනුවත් කර නොමැති බවද ඖෂධ නියාමන රාජ්‍ය අමාත්‍යංශය නිවේදනයක් නිකුත් කරමින් පවසයි.
එමෙන්ම විදේශ විනිමය ගැටළුවක් පවතින අවස්ථාවේ රජයේ රෝහල් සඳහා අඛණ්ඩව ඖෂධ සැපයීමට වැඩිය සැපයීම් ඒකකය, රාජ්‍ය ඖෂධ නීතිගත සංස්ථාව සහ රාජ්‍ය ඖෂධ නිෂ්පාදන සංස්ථාව දැඩි වෙහෙසකර කටයුත්තක නියැළී සිටින බවද අදාළ නිවේදනයේ සඳහන් කර ඇත.
නියෝස්ටිග්මින් ඖෂධයේ මිලිග්‍රෑම් 0.5 කුප්පි වෛද්‍ය සැපයීම් අංශ සතුව ඇති බවත් එහි අනෙකුත් මාත්‍රා තවත් දින තුනකින් ශ්‍රී ලංකාවට පැමිණීමට නියමිත බවත් ඖෂධ නියාමන රාජ්‍ය අමාත්‍යංශය අදාළ නිවේදනය මගින් පෙන්වාදෙයි.වැඩිදුරටත් දැක්වෙන්නේ පේරාදෙණිය රෝහල වෙත මේ වනවිටත් නියෝස්ටිග්මින් ඖෂධයේ මිලිග්‍රෑම් 0.5 කුප්පි සැපයීමට අවශ්‍ය පියවර ගෙන ඇති බවය.
මේ අතර රෝහලක යම් ඖෂධයක් හෝ වෛද්‍ය උපකරණ හිඟයක් පවතී නම් ඒ පිළිබඳව වෛද්‍ය සැපයීම් අංශය වෙත දැනුම් සඳහා “ඔසු දිරිය” නම් පැය 24ම ක්‍රියාත්මක වන දුරකථන ඇමතුම් මධ්‍යස්ථානයක් ද ක්‍රියාත්මක බව අදාළ නිවේදනය මගින් වැඩිදුරටත් පෙන්වාදෙයි.
