කහල්ල – පල්ලෙකැලේ අභය භූමියේ සිට කලාවැව ඉස්මත්තේ සිටින සිය රංචුව සොයා එගොඩ වීමට යන අතරතුර කලාවැව – මහවැලි සංචාරක නිකේතනයට අද දහවල් කාලයේ පැමිණ; කලහකාරී ලෙස හැසිරුණු වන අලියෙකු නිසා එහි කාර්ය මණ්ඩලය මෙන් ම ගම්මානයේ ජනතාව ද භීතියට පත්ව තිබෙනවා.
අප ප්රාදේශීය වාර්තාකරු පැවසුවේ; විජිතපුර හා ගල්කිරියාගම වනජීවී කාර්යාලවල නිලධාරීන් පැමිණ සිදුකළ ඒකාබද්ධ මෙහෙයුමකින් පසුව එම වනඅලියා කලාඔය ආසන්න රක්ෂිතයකට පලවා හැරීමට කටයුතු කෙරුණු බවයි.
බලුලුවැව ප්රදේශයේ සිට කලා – බලලුවැව බැම්ම මතින් පැමිණ ඇති එම අලියා කලාවැව මහවැලි සංචාරක නිකේතනය අසලින් බලලුවැවට බැස පිහිනා යමින් කලැවැව සංචාරක නිකේතන භූමියට රිංගාගෙන තිබෙනවා.
එහිදී සංචාරක නිකේතනයේ ආරක්ෂක අංශයේ නිලධාරීන් හා කාර්ය මණ්ඩලය එක් ව වනඅලියා එලවා දැමීමට උත්සාහ ගත් අවස්ථාවේදියි එම සත්ත්වයා කලහකාරී ලෙස හැසිරී ඇත්තේ.
එහෙත් එම වනඅලියා පැය ගණනක් සංචාරක නිකේතන භූමියේ සැරිසරමින් සිට පසුව එම සංචාරක නිකේතනයේ ප්රධාන පිවිසුම් දොරටුවෙන් යළි කලාවැව – ගලේවෙල ප්රධාන මාර්ගයට පිවිස කලාබලලුවැව බැම්ම ඔස්සේ බලලුවැව දෙසට ගොස් තිබෙනවා.
ඉන් අනතුරුව එම වනඅලියා බලලුවැව- මල්වත්ත ගම්මානය දෙසට ගමන් කර ඇති අතර; වනජීවී නිලධාරීන් විසින් සිදු කළ පැය කිහිපයක මෙහෙයුමකින් පසුව ගම්මානය දෙසට ගමන් කළ එම අලියා කලාඔය ආසන්නයේ වූ කැලෑබද ප්රදේශයකට පලවා හැරීමට වනජීවී නිලධාරීහු කටයුතු කළා.
මෙම වනඅලියා කහල්ල පල්ලෙකැලේ අභය භූමියේ සිට කලාවැව ඉස්මත්තේ සිටින සිය රංචුව සොයා එගොඩ වීමට යන අතරතුර මෙලෙස සංචාරක නිකේතනයට පැමිණෙන්නට ඇතැයි වනජීවි නිලධාරීන් විශ්වාස කරනවා.
