අපල උපද්රව දුරුවීම සඳහා යැයි පවසා යාථිකාවක් කරන මුවාවෙන් ලක්ෂ 38 කට වැඩි වටිනාකමකින් යුත් රන් ආභරණ සොරකම් කිරීමේ සිද්ධියක් සම්බන්ධයෙන් හලාවත පොලිසිය විමර්ශනයක් ආරම්භ කර තිබෙනවා.
මෙම සිදුවීමට මුහුණ දී ඇත්තේ හලාවත, මුන්නේෂ්වරම් ප්රදේශයේ පදිංචි පුද්ගලයෙක් බවයි වාර්තා වන්නේ.
පසුගිය පළමුවනදා මුන්නේෂ්වරම දේවාලය ආසන්නයේ දී හමුවූ පුද්ගලයින් තිදෙනෙකුගෙන් අයෙක් තමන්ට ශාස්ත්රයක් කියූ බවත්, එම අනාවැකියට අනුව තමන්ට සහ දරුවන්ට දැඩි අපල කාලයක් උදාවී ඇති බැවින් ඉන් මිදීම සඳහා ශාන්තිකර්මයක් සිදුකිරීමට තමන් කටයුතු කළ බව පැමිණිලිකරු පොලිසියට පවසා තිබෙනවා.
එම අදහසට අනුව තමන්ට හමුවූ තිදෙනාගෙන් එක් අයෙකු පසුගිය 03 වනදා නිවසට ගෙන්වාගෙන ශාන්තිකර්මය සිදුකළ බවවයි ඔහු පොලිසියට පවසා ඇත්තේ.
එහිදී එම පුද්ගලයා පැවසූ ආකාරයට තමන්ට, බිරිඳට සහ දරුවන්ට අයිතින් රන් ආභරණ මුට්ටියක දමා පූජා භාණ්ඩයක් ලෙස ශාන්තිකර්මය කරමින් සිටි අයට භාර දී තිබෙනවා.
ශාන්තිකර්මය සිදුකළ අයගේ උපදෙස් අනුව දෙවියන් පිදීම සඳහා පවුලේ සියළුම දෙනා නිවස ඉදිරිපිට කපුරු දැල්වීමක් සිදුකළ බවත්, රන් ආභරණ තැම්පත් කරන ලද මුට්ටිය පූජා කාමරයේ තබන ලෙසත් දින 04ක කාලයක් යන තෙක්එම මුට්ටිය විවෘත නොකරන ලෙසත් එම පුද්ගලයා නිවැසියන්ට පවසා ඇති බව සඳහන්.
කෙසේ වෙතත් ඇති වූ සැකයක් මත පසුගිය 04 වනදා උදෑසන කාලයේ රන් ආභරණ දමා තිබූ මුට්ටිය විවෘත කර බැලූ අවස්ථාවේ දී එහි කිසිවක් නොතිබූ බවයි පැමිණිලිකරු පොලිසිය හමුවේ වැඩිදුරටත් පවසා ඇත්තේ.
තම නිවසට පැමිණ ශාන්තිකර්මය සිදුකල පුද්ගලයා ඉන්දීය ජාතිකයෙකු බවට සැකයක් පවතින බවට ද ඔහු පවසා තිබෙනවා.
