ශ්‍රී ලාංකික කතකගේ විදෙස් මුදල් සහ ස්වර්ණාභරණවලට චීන ගුවන් මගියා විදලා

ඩුබායි නුවර සිට කටුනායක ගුවන් තොටුපොළ වෙත පැමිණෙමින් තිබූ ගුවන් යානයක ගමන් ගත් ශ්‍රී ලාංකික ගුවන් මගියෙකුගේ රුපියල් දහතුන් ලක්ෂ දහහතරදහස් හාරසීයයක් වටිනා විදේශ මුදල් සහ ස්වර්ණාභරණ තොගයක් සොරා ගත් චීන ජාතිකයෙකු කටුනායක ගුවන් තොටුපොළ පොලීසිය මහත් පරිශ්‍රමයක් දරා අත්අඩංගුවට ගෙන තිබෙනවා.

ඊශ්‍රායලයේ ළමා සංවර්ධන උපදේශිකාවක ලෙස සේවය කරන බොරලැස්ගමුව ප්‍රදේශයේ පදිංචි 52 හැවිරිදි ශ්‍රී ලාංකික කාන්තාවකට අයත් විදෙස් මුදල් සහ ස්වර්ණාභරණ සැකකාර චීන ජාතිකයා විසින් සොරාගෙන ඇති බවයි වාර්තා වන්නේ.

මෙම කාන්තාව ඊයේ (13) උදෑසන 08.15ට අබුඩාබි නුවර සිට ෆ්ලයි ඩුබායි ගුවන් සේවයේ එෆ්.ඉසෙඩ් – 579 දරණ ගුවන් යානයෙන් කටුනායක ගුවන් තොටුපොළ වෙත පැමිණ තිබුණා.

එම කාන්තාව විසින් රැගෙන ආ අත්බෑගය ගුවන් සේවිකාවකගේ ඉල්ලීම මත ගුවන් යානයේ ඇයගේ ආසනයට ඉහළින් ඇති ගමන් මලු රාක්කය තුළ තබා ඇති බවයි වාර්තා වාර්තා වන්නේ.

කෙසේ වෙතත් ඇය ගුවන් යානයෙන් පිටතට පැමිණ ගුවන් තොටුපොළ කුලී රථයක් ලබාගැනීම සදහා මුදල් ගෙවීමට සූදානම් වන අවස්ථාවේ තම අත්බෑගය තුළ වූ ඇමෙරිකානු ඩොලර් 3,660ක්, යුරෝ 500ක් සහ ස්වර්ණාභරණ තොගය ද නොමැති බව වටහා ගෙන තිබෙනවා.

ඒ අනුව ඇය වහාම ඒ පිළිබඳව කටුනායක ගුවන් තොටුපොළ පොලීසිය වෙත පැමිණිලි කර ඇති අතර, පොලීසිය ඇයද සමඟ කටුනායක ගුවන් තොටුපොළ ආරක්ෂක කැමරා පද්ධතිය නිරීක්ෂණය කර තිබෙනවා.

එම නිරීක්ෂණය කිරීම්වල දී කාන්තාව අසල සැක කටයුතු ගැවසෙන චීන ජාතිකයෙකු හදුනාගැනීමටයි පොලිසියට හැකිව ඇත්තේ.

පසුව ඔහු පිළිබද වැඩිදුර විස්තර අනාවරණය කර ගත් පොලීසිය , ඒ වනවිටත් ගුවන් තොටුපොළෙන් පළා ගොස් කිඹුලපිටිය ප්‍රදේශයේ චීන ජාතික කාන්තාවක් විසින් පවත්වා ගෙන යමින් සිටින නේවාසිකාගාරයක සැඟවී සිටියදී සැකකරුව අත්අඩංගුවට ගැනීමට පොලිසිය කටයුතු කර තිබෙනවා.

එහිදී 25 හැවිරිදි මෙම චීන ජාතිකයා හිස තබා ගෙන නිදාගෙන සිටි කොට්ටයෙහි කවරය තුළ මෙම විදේශ මුදල් සියල්ල සහ ස්වර්ණාභරණ තොගය සඟවා ගෙන සිටියදී පොලිසිය විසින් සොයාගෙන තිබෙනවා.

අත්අඩංගුවට ගැනුණු චීන ජාතිකයා අද (14) දිනයේ මීගමුව මහේස්ත්‍රාත් අධිකරණය වෙත ඉදිරිපත් කිරීමට නියමිත බවයි වාර්තා වුණේ.