ශ්රී ලංකාවේ කෘෂිකාර්මික සංවර්ධනය සඳහා එක්සත් ජාතින්ගේ සංවිධානයට අනුබද්ධ ආයතන මගින් මෙතෙක් ලබා දුන් සහයෝගය ඉදිරියටත් අඛණ්ඩවම ලබා දෙන බව එක්සත් ජාතින්ගේ මෙරට නියෝජිත Mark Andre Franche මහතා පවසනවා.
අද (23) පෙරවරුවේ ඔහු කෘෂිකර්ම හා වැවිලි කර්මාන්ත අමාත්ය මහින්ද අමරවීර මහතා හමුවී මෙරට කෘෂිකර්මාන්තයේ ඉදිරි ඉළක්ක පිළිබඳව සාකච්ඡා කළ බවයි එම අමාත්යංශය සඳහන් කළේ. මෙම සාකච්ඡාව කෘෂිකර්ම අමාත්යාංශයේ දී පැවැත්වුණා.
මෙහිදී අදහස් පළ කළ අමාත්යවරයා කියාසිටියේ පසුගිය වගා කන්න තුන තුළ එක්සත් ජාතීන්ගේ සංවිධානය යටතේ පවතින එක්සත් ජාතීන්ගේ ආහාර හා කෘෂිකර්ම වැඩසටහන, කෘෂිකාර්මික සංවර්ධනය සඳහා වන අන්තර් ජාතික අරමුදල වැනි ආයතන මගින් විශාල සහයෝගයක් ලබා දුන් බවයි.
විශේෂයෙන් රට තුළ පෑවති ආර්ථික අර්බුදයත් සමග ආර්ථික ස්ථාවරභාවය සඳහා කෘෂිකර්මාන්තය තුළින් ලබා දෙන දායකත්වය ඉහළ නැංවීම සඳහා ගොවි ජනතාවට පොහොර, ඉන්ධන මෙන්ම මුල්යාධාර ද ලබා දෙනු ලැබුවා.
මෙම ආධාර හේතුවෙන් ගොවි ජනතාවට විශාල පහසුවක් වූ බවත් ඒ සම්බන්ධව කටයුතු කළ එක්සත් ජාතින්ගේ සංවිධානයට මෙන්ම ඊට අනුබද්ධ ආයතනවලට ද රජය වෙනුවෙන් කෘතවේදිත්වය පළ කරන බවයි අමාත්යවරයා සඳහන් කළේ.
මෙහිදී අදහස් පළ කළ එක්සත් ජාතින්ගේ සංවිධානයේ මෙරට නියෝජිතවරයා කියාසිටියේ තම සංවිධානයේ මෙන්ම ඊට අනුබද්ධ ආයතනවල සහයෝගය තවදුරටත් ශ්රී ලංකාවට ලබා දීමට පියවර ගන්නා බවයි.
විශේෂයෙන් කෘෂිකාර්මික පාරිසරික සංවර්ධනය, ජල කළමනාකරණය, දේශගුණ විපර්යාසවලින් මෙරට කෘෂිකර්මාන්තය ආරක්ෂා කිරීම , කෘෂිකාර්මික තාක්ෂණය හදුන්වා දීම වැනි අංශ කෙරෙහි ප්රමුඛත්වය ලබා දී කටයුතු කරන බවද හෙතෙම ප්රකාශ කළා.
