Update :- දෙදෙනකුට මරු කැඳවූ අතුරුගිරිය වෙඩි තැබීමෙන් බරපතළ තුවාල ලැබූ ප්රසිද්ධ ව්යාපාරික සුරේන්ද්ර වසන්ත නොහොත් ‘ක්ලබ් වසන්තගේ’ බිරිඳට ශල්යකර්මයක් සිදු කර තිබෙනවා.
හෝමාගම රෝහල් ආරංචි මාර්ග පවසන්නේ; අද (08) පෙරවරුවේ මෙම කාන්තාව වෙඩි වැදීමෙන් සිදු වූ බරපතළ තුවාල සමග රෝහලට ඇතුළත් කළ බවයි.
ක්ලබ් වසන්තට අයත් නව ව්යාපාරික ස්ථානයක් විවෘත කිරීමේ උත්සවයක් අද පෙරවරුවේ යෙදී තිබුණා.
ඒ අතුරුගිරිය – ඔරුවල ප්රදේශයේ යි මෙම නව ව්යාපාරික මධ්යස්ථානය තවත් කඩ කාමරයක ඉහළ මහලේ පිහිටා තිබුණේ.
මෙම ව්යාපාරික මධ්යස්ථානය ‘ටැටූ’ (Tatoo) මධ්යස්ථානයක් ලෙසටයි අද දින සුබ මොහොතින් ආරම්භ කිරීමට කටයුතු සූදානම් කර තිබී ඇත්තේ.
එම ව්යාපාරික මධ්යස්ථානය විවෘත කර ටික වේලාවක් ගත වෙද්දී සුදු පැහැති මෝටර් රථයකින් හිස් වැසුම් සහ මුඛ ආවරණ පැළැඳ පැමිණි නන්නාඳුනන පුද්ගලයින් දෙදෙනකු විසින් ක්ලබ් වසන්ත ඇතුළු පිරිසකට වෙඩි තැබීම් සිදු කළා.
එහිදී ක්ලබ් වසන්ත නොහොත් සුරේන්ද්ර වසන්ත එම ස්ථානයේ දී ම ජීවිතක්ෂයට පත් වූයේ උරහිසේ සිට ඉනෙන් පහළ ප්රදේශ වන තෙක් මුළු සිරුර පුරා වැදුණු වෙඩි උණ්ඩ හේතුවෙන්.
එමෙන්ම මෙම වෙඩි ප්රහාරයන්ගෙන් මෙරට ජනප්රිය ගායන ශිල්පිනී කේ. සුජීවාට ද බරපතළ තුවාල සිදු වූ අතර ඇය වැඩිදුර ප්රතිකාර සඳහා කොළඹ ජාතික රෝහලට ඇතුළත් කර තිබෙනවා.
එම ස්ථානයේ රැඳී සිටි ක්ලබ් වසන්තගේ බිරිඳට ද වෙඩි ප්රහාරයට ලක් වන්නට සිදු වූ අතර; ඇය ද සිදුවීමෙන් බරපතළ තුවාල ලබා මෙලෙස හෝමාගම මූලික රෝහලට ඇතුළත් කෙරුණු අතර ඉන් පසුවයි ශල්යකර්මයකට මුහුණ පා ඇත්තේ.
මෙම සිදුවීමෙන් තවත් තිදෙනෙකු රෝහල්ගත කර ප්රතිකාර ලබන බව ද වාර්තා වනවා.
මේ අතර ඝාතකයින් පැමිණි මෝටර් රථය කොරතොට – කඩුවෙල ප්රදේශයේ මග දමා තිබියදී පොලිස් භාරයට ගැනුණා.
