පාකිස්තානයේ හිටපු අගමැති ඉම්‍රාන් ඛාන් නිදහස් කරන ලෙසට රජයට බලකරමින් සිදු කෙරෙන විරෝධතා හේතුවෙන් එරටට සැලකිය යුතු ගණයේ ආර්ථික අලාභයක් සිදු ව තිබෙනවා.
එරට මාධ්‍ය වාර්තා කරන්නේ වත්මන් පාකිස්තාන මුදල් ඇමති මුහම්මද් අවුරංසෙබ් සඳහන් කරන පරිදි විපක්ෂය විසින් ගෙන යනු ලබන විරෝධතා හේතුවෙන් දෛනික මූල්‍ය හානිය බිලියන 190 ඉක්මවා ඇති බවයි.
පාකිස්තාන ටෙහ්රීක්-ඊ-ඉන්සාෆ් (පීටීඅයි) සංවිධානය ඉස්ලාමාබාද් දෙසට ගමන් කිරීමට සැලසුම් කර තිබියදී මුහම්මද් අවුරන්ග්සෙබ් මාධ්‍ය හමුවක් පවත්වමින් මේ බව සඳහන් කළා.
රටේ ආර්ථිකය සුරක්ෂිත කිරීම සඳහා දේශපාලන ස්ථාවරත්වයේ අවශ්‍යතාව අවධාරණය කරමින් ඔහු එවැනි විරෝධතාවල දැඩි ආර්ථික බලපෑම ඉස්මතු කරමින් මෙම මාධ්‍ය හමුව පැවැත්වූ බවයි වාර්තා වන්නේ.
විරෝධතා හේතුවෙන් ඇති වන බාධා බදු එකතු කිරීමට බාධා, ව්‍යාපාරවලට බාධා සහ අපනයනවලට අහිතකර ලෙස බලපාන බව ඔහු පැහැදිලි කළා.
එවැනි උද්ඝෝෂණවල දී නීතිය හා සාමය ආරක්ෂා කිරීම සඳහා අමතර වියදම් ලෙස ගණනය කෙරෙනු ඇති බවයි හෙතෙම වැඩිදුරටත් සඳහන් කළේ.
තොරතුරු තාක්ෂණ සහ විදුලි සංදේශ ක්ෂේත්‍ර වසා දැමීම සමාජ ගතිකත්වයට සහ ඩිජිටල් ආර්ථිකයට බලපාන පරිදි වෙනමම ආර්ථික පාඩුවලට මුහුණදෙන බවත් අමාත්‍යවරයා අවධාරණය කළා.
මුදල් අමාත්‍යාංශයේ සවිස්තර වාර්තාවකට අනුව විරෝධතා හේතුවෙන් දෛනික දල දේශීය නිෂ්පාදිතයෙන් රුපියල් බිලියන 144ක පාඩුවක් සිදු ව තිබෙනවා.
අපනයන අඩු කිරීම් සඳහා දිනකට රුපියල් බිලියන 26ක් වැය වන අතර සෘජු විදේශ ආයෝජන පහත වැටීමෙන් රුපියල් බිලියන 3ක අමතර පාඩුවක් සිදුවන බවත් ගණනය කර තිබෙනවා.
