බොරැල්ල වෙස්ටන් රෝහලේ සභාපති වෛද්‍ය මහාචාර්ය රිස්වි ෂෙරිෆ් මහතාට එරෙහිව හෙට දින ආරම්භ වීමට නියමිතව තිබූ විනය පරීක්ෂණය පැවැත්වීම අත්හිටුවමින් අභියාචනාධිකරණය අද ශ්‍රී ලංකා වෛද්‍ය සභාව වෙත අතුරු නියෝගයක් නිකුත් කර තිබෙනවා.
මහාචාර්ය රිස්වි ෂෙරිෆ් මහතා විසින් ඉදිරිපත් කළ රිට් පෙත්සමක් සලකා බැලීමෙන් අනතුරුවයි අභියාචනාධිකරණයේ සභාපති විනිසුරු නිශ්ශංක බන්දුල කරුණාරත්න සහ විකුම් කළුආරච්චි යන මහත්වරුන්ගෙන් සමන්විත විනිසුරු මඩුල්ල විසින් මෙම නියෝගය නිකුත් කළේ.
පෙත්සම්කරු වෙනුවෙන් පෙනී සිටි ජනාධිපති නීතිඥ ෆයිසර් මුස්තාපා මහතා අධිකරණය හමුවේ කරුණු දක්වමින් කියාසිටියේ තම සේවා දායකයා ශ්‍රී ලංකාවේ සිටින පුරෝගාමී වකුගඩු ශල්‍ය වෛද්‍යවරයෙකු බවයි.
ඔහු විසින් පවත්වාගෙන යන බොරැල්ල වෙස්ටර්න් රෝහලේ සිදු කළ වකුගඩු ශල්‍යකර්ම සම්බන්ධයෙන් සෞඛ්‍ය අමාත්‍යාංශය විසින් විමර්ශන කමිටුවක් පත් කර වාර්තාවක් ඉදිරිපත් කළ බවත් එම වාර්තාව පදනම් කරගෙන ඉදිරි පියවර කිසිවක් නොගන්නා ලෙසට අභියාචනාධිකරණය විසින් නොවැම්බර් මස 23 වනදා තීන්දුවක් ලබාදී තිබූ බවත් ජනාධිපති නීතිඥවරයා පෙන්වා දුන්නා.
එසේ තිබියදී අභියාචනාධිකරණය මගින් තහනම් කර තිබෙන අදාළ වාර්තාව පදනම් කරගෙන ශ්‍රී ලංකා වෛද්‍ය සභාව විසින් තම සේවාදායකයාට එරෙහිව හෙට දින විමර්ශනයක් පැවැත්වීමට තීරණය කර ඇති බවත් එම තීරණය නීතියට පටහැනි බවට තීන්දුවක් ලබාදෙන ලෙසත් ජනාධිපති නීතිඥ ෆයිසර් මුස්තාපා මහතා අධිකරණයෙන් ඉල්ලා තිබෙනවා.
ඉදිරිපත් වූ කරුණු සලකා බැලූ අභියාචනාධිකරන විනිසුරු මඩුල්ල පෙත්සම්කාර වෛද්‍යවරයාට එරෙහිව හෙට දින පැවැත්වීමට නියමිත විනය පරීක්ෂණය ක්‍රියාත්මක කිරීම වළක්වමින් අතුරු තහනම් නියෝගයක් නිකුත් කළා.
ඉන් අනතුරුව පෙත්සම ජනවාරි මස 18 වනදා කැඳවන ලෙසත් නියෝග කෙරුණා.
