රුපියල් කෝටියක් පමණ වටිනා විදේශීය මත්පැන් බෝතල් 118ක් කටුනායක ගුවන් තොටුපොළ තුළ ඇති රථ ගාලක නවතා තිබූ කුඩා ලොරි රථයක් තුළ සඟවා ගෙන සිටි ජාවාරම්කරුවෙකු අද (05) දින ගුවන් අපරාධ පරීක්ෂණ දෙපාර්තමේන්තු නිලධාරීන් විසින් අත්අඩංගුවට ගනු ලැබුවා.
මෙම සැකකරු කොළඹ – 13 ප්‍රදේශයේ පදිංචි මත්පැන් ජාවාරම් සිදු කරන ව්‍යාපාරිකයෙක් බවයි වාර්තා වී ඇත්තේ.
මොහු කටුනායක ගුවන් තොටුපොළ වෙත වෙනත් රටවල සිට පැමිණෙන ගුවන් මගීන් විසින් රැගෙන එන මත්පැන් බෝතල් ගුවන් තොටුපොළ රථ ගාල තුළ රැඳී සිටිමින්, අඩු මිලට ලබාගෙන, මෙසේ එකතු කරමින් , පසුව ඒවා ශ්‍රී ලංකාව පුරා සංචාරක හෝටල් වෙත වැඩි මිලට අලෙවි කිරීමේ ජාවාරමක නිරත වී සිටින්නෙකු බවත් හෙළි ව තිබෙනවා.
ඔහු සන්තකයෙහි ලේබල් – 5 විස්කි බෝතල් 99 ක් , බ්ලැක් ලේබල්, විස්කි බෝතල් 14 ක් සහ වැට් – 69 විස්කි බෝතල් 05ක් තිබී කටුනායක ගුවන් තොටුපොළ අපරාධ පරීක්ෂණ දෙපාර්තමේන්තු නිලධාරීන් විසින් සොයාගනු ලැබුවා.
මෙම ව්‍යාපාරිකයා සමග ඔහු විසින් එක් රැස්කර ගෙන තිබූ විස්කි බෝතල් තොගය අද දින මීගමුව මහේස්ත්‍රාත් අධිකරණය වෙත ඉදිරිපත් කිරීමට නියමිතයි.
