නව තරග විභාගයක් පැවැත් වීමකින් තොරව ශ්‍රී ලංකා විදුහල්පති සේවයේ තුන්වන ශ්‍රේණිය සඳහා නව පත් කිරීම් සිදු කිරීම වළක්වමින් නිකුත් කර ඇති අතුරු තහනම් නියෝගයට එරෙහිව ගොනු කළ මෝසමක් සලකා බැලීම සඳහා හෙට දින කැඳවන ලෙස ශ්‍රේෂ්ඨාධිකරණය නියම කළා.
2019 වසරේ පවත්වන ලද තරඟ විභාගය පදනම් කරගෙන අදාළ පත් කිරීම් සිදු කිරීම සඳහා මීට පෙර ශ්‍රේෂ්ඨාධිකරණය හමුවේ එකඟතාවයක් ඇතිකර ගෙන තිබියදී ඊට පටහැනිව යමින් ගොනු කළ පෙත්සමකට අදාළව මෙම අතුරු තහනම් නියෝගයක් නිකුත් කිරීමට සම්බන්ධයෙන් මෙම මෝසම ගොනු කර තිබුණා.
එම මෝසම අද අගවිනිසුරු ජයන්ත ජයසූරිය, ජනක් ද සිල්වා සහ ශිරාන් ගුණරත්න යන මහත්වරුන්ගෙන් සමන්විත ශ්‍රේෂ්ඨාධිකරණ විනිසුරු මඩුල්ල හමුවේ කැඳවනු ලැබුවා.
විදුහල්පති තනතුරුවල පුරප්පාඩු පිරවීම සම්බන්ධයෙන් මීට පෙර ලංකා ගුරු සේවා සංගමය විසින් ශ්‍රේෂ්ඨාධිකරණයට මූලික අයිතිවාසිකම් පෙත්සමක් ගොනු කර තිබූ බව එහිදී නීතිඥවරු අධිකරණයට දැනුම් දුන්නා.
එම පෙත්සම අගවිනිසුරුවරයා ප්‍රමුඛ ශ්‍රේෂ්ඨාධිකරණ විනිසුරු මඩුල්ලක් හමුවේ මීට පෙර කැඳවූ අවස්ථාවේදී ශ්‍රී ලංකා විදුහල්පති සේවයේ තුන්වන ශ්‍රේණිය සඳහා පත්කිරීම් 2019 වසරේ දී සිදු කළ පැවති විභාග ප්‍රතිඵල මත පදනම්ව සිදු කිරීමට එකඟත්වයක් ඇති වූ බවත් එම සංගමය වෙනුවෙන් පෙනී සිටි නීතිඥවරු පෙන්වා දුන්නා.
ඒ අනුව එම පත්කිරීම් සිදුකිරීමට තීරණය කළ අවස්ථාවේදී ඊට එරෙහිව ශ්‍රී ලංකා ගුරු සේවයට අයත් දෙවන ශ්‍රේණියේ ගුරුවරයකු වන පූජ්‍ය බුද්ධං කෝට්ටේ සුමනචන්ද්‍ර හිමියන් විසින් ගොනු කළ මූලික අයිතිවාසිකම් පෙත්සමක් සලකා බැලූ ශ්‍රේෂ්ඨාධිකරණය අදාළ පත්වීම් පිරිනැමීම වළක්වාලමින් තහනම් නියෝගයක් නිකුත් කර තිබෙන බවත් එම නීතිඥවරු සඳහන් කලා.
මෙම මෝසම කැඳවු අවස්ථාවේදී පූජ්‍ය බුද්ධං කෝට්ටේ සුමනචන්ද්‍ර හිමියන් වෙනුවෙන් පෙනී සිටි ජනාධිපති නීතිඥ සාලිය පීරිස් මහතා සඳහන් කළේ මෙම කරුණ සම්බන්ධයෙන් සිය සේවාදායකයාගේ උපදෙස් ලබා ගැනීමට අවශ්‍ය බවයි.
ඒ අනුව අදාළ මෝසම හෙට දින කැඳවන ලෙසත් නියෝග කෙරුණා.
