ලබන 2023 වසරේ ජනවාරි මාසයේ සිට විදුලි පාරිභෝගිකයන්ට විදුලි බිල්පත වෙනුවට දුරකථනයට කෙටි පණිවුඩයක් මාර්ගයෙන් බිල්පත යොමු කිරීමට සැලසුම් කර තිබෙනවා.
බලශක්ති අමාත්‍ය කංචන විජේසේකර ප්‍රකාශ කළේ ඒ වෙනුවෙන් විදුලිබල මණ්ඩලයේ පරිගණක පද්ධතිය මේවන විට යාවත්කාලීන කරමින් පවතින බවයි.
ජනවාරි මාසයේ සිට විදුලි බිල්පත දුරකතනයට යොමු කිරීමේ වැඩසටහන කොළඹ ද ඇතුලු නාගරික ප්‍රදේශ කේන්ද්‍ර කර ගනිමින් ආරම්භ කරන බව ද අමාත්‍ය කංචන විජේසේකර ප්‍රකාශ කළා.
මේ අතර ඊයේ පැවති මාධ්‍ය හමුවකදී අමාත්‍ය කංචන විජේසේකර කියාසිටියේ 2023 වසරේ ජනවාරි මාසයේ සිට යළිත් විදුලි බිල සංශෝධනයක් සිදු කරන බවයි.
ඒ අනුව ජනවාරි මාසයේ සිට විදුලි බිල නැවත ඉහළ දැමීමට පියවර ගන්නා බවයි ඔහු කියාසිටියේ.
මෙම ගාස්තු සංශෝධනයට අවශ්‍ය නීතිමය බලය ලැබී ඇති අතර එය නීතිපතිවරයා විසින් ද තහවුරු කර ඇති බවයි අමාත්‍යවරයා කියාසිටියේ.
විදුලි බිල වැඩි විය යුතු ආකාරය සම්බන්ධයෙන් සවිස්තරාත්මක තොරතුරු ලබන සතිය වන විට අමාත්‍ය මණ්ඩලයට ඉදිරිපත් කිරීමට හැකියාව ලැබෙනු ඇතැයි ද ඔහු විශ්වාසය පළ කරනවා.
ඒ අනුව ජනවාරි මාසයේ සිට විදුලිබිල වැඩි කිරීමට කටයුතු කරන බවයි අමාත්‍ය කංචන විජේසේකර කියාසිටියේ.
