වැල්ලම්පිටිය පොලිස් වසමේ කිත්තම්පහුව ප්රදේශයේ ලැඟුම්හලක දී අද (25) අලුයම සිදුවූ වෙඩි තැබීමේ සිද්ධියේ වෙඩික්කරුවන් පැමිණි බවට සැකකරන යතුරුපැදිය සොයාගෙන තිබෙනවා.
පොලිසියට ලද තොරතුරක් මත මුල්ලේරියාව ප්රදේශයේ දමාගොස් තිබිය දී අද (25) දහවල් මෙම යතුරුපැදිය සොයා ගත් බවයි පොලිසිය පවසන්නේ.
යතුරුපැදිය ද සමඟ ආරක්ෂිත හිස් වැසුම් දෙකක් ද ඒ ආසන්නයේ තිබී සොයාගැනීමට හැකි වූ බවයි පොලිසිය වැඩිදුරටත් සඳහන් කළේ.
ලැඟුම්හලේ නවාතැන් ගෙන සිටි සසික ප්රියදර්ශන නැමැති සේදවත්ත ප්රදේශයේ පදිංචි 26 හැවිරිදි පුද්ගලයෙක් සහ ඔහු සමඟ සිටි බාල සුබ්රමනියම් අනූෂා නැමැති කාන්තාවක් මෙම වෙඩික්කරුවන්ගේ ඉලක්කය වී තිබුණා.
මෙලෙස වෙඩික්කරුවන්ගේ ඉලක්කය වූ සසික ප්රියදර්ශන නැමැත්තා වනාතේ දුමින්ද යන අයගේ පාර්ශ්වයේ සාමාජිකයෙක් බවයි අනාවරණය වී ඇත්තේ.
පොලිසිය සැකපළ කරන්නේ වනාතේ චතූ යන අයගේ පාර්ශ්වය විසින් මෙම වෙඩි තැබීම සිදුකරන්නට ඇති බවයි.
යතුරුපැදියකින් පැමිණි නාඳුනන පුද්ගලයින් දෙදෙනකු විසින් පිස්තෝල වර්ගයේ ගිනි අවියකින් වෙඩි තැබීමක් සිදුකර පලා ගොස් තිබෙනවා.
මෙම වෙඩි තැබීමෙන් කිසිවෙකුටත් තුවාල හෝ ජීවිත හානි සිදුව නොමැති අතර, වෙඩි තැබීමට පැමිණි පුද්ගලයින්ගේ ජංගම දුරකථනයක් සහ වෙඩි තැබීමට භාවිත කළ පිස්තෝල වර්ගයේ ගිනි අවියේ මැගසීනය ද එම ස්ථානයේ තිබී සොයාගත් බව පොලිසිය සඳහන් කළා.
