අකුරැස්ස නගරයේ වෙළදසැල් තුළ පාලන මිලට වඩා වැඩියෙන් සහල් අලෙවි කරනු ලබන බවට සහ සහල් සඟවාගෙන සිටින බවට ලද පැමිණිලි මත පාරිභෝගික සේවා අධිකාරියේ නිලධාරීන් විසින් ඊයේ (13) අදාල වෙළෙඳසැල් වටලා තිබෙනවා.
එහිදී පාලන මිලට වඩා වැඩි මිලට විකිණීමට ගබාඩා කර තිබූ සහල් කිලෝග්‍රෑම් තිස් දහසකට අධික සහල් තොගයක් සොයා ගැනිමට පාරිභෝගික සේවා අධිකාරි නිලධාරීන්ට හැකියාව ලැබුණා.
උපාය දූතයින් යොදවා මෙම වැටලීම් සිදුකර ඇති අතර එහිදී වෙළඳසැල් හිමියෙක් විසින් කැකුළු සහල් කිලෝවක් රුපියල් 270ක මුදලකට එම උපාය දූතයන්ට අලෙවි කර ඇති බවයි වාර්තා වුණේ.
අනතුරුව එම අධිකාරියේ අනෙකුත් නිලධාරින් පැමිණ වෙළඳසැලේ ගබඩා තුළ සිදුකළ සෝදිසි කිරිම් වලදී වැඩි මිලට විකිණීමට ගබඩාකර තිබූ මෙම සහල් තොගය සොයා ගැනිමට හැකිව තිබෙනවා.
සුදු හා කැකුළු යන දෙවර්ගයටම අයත් සහල් උරවල බහා එහි ගබඩා කර තිබූ අතර එහි තිබි කිලෝග්‍රෑම් 50 හාල් මිටි 310ක්, කිලෝග්‍රෑම් 25 හාල් මිටි 450ක් හා කිලෝග්‍රෑම් 10 හාල් මිටි 420ක් සොයා ගැනුණා.
වෙළඳසැලේ හිමිකරු එහිදී කියා සිටියේ තමන් මෙම සහල් පාලන මිල පැනවීමට පෙර රැගෙන ආ ඒවා බවත් තමන් මෙම සහල් මිලදී ගත් මිල හා සැසදිමේදී පාලන මිලට කිසිසේත් හාල් ලබාදිය නොහැකි බවයි.
කෙසේ වෙතත් මෙම සහල් බහා තිබු උරවල සහල් නිෂ්පාදිත වර්ෂය ලෙස 2021 වර්ෂය සදහන්ව තිබුණා.
මේ අතර අකුරැස්ස නගරයේ තවත් වෙළඳසැලැක් තුළ සිදුකළ වැටලිමකදී අලෙවි කිරීමට තබා තිබූ ඇසුරුම් කරන ලද හාල් උරවල මිල සදහන් ස්ටිකර ගලවා තිබූ තවත් සහල් තොගයක් සොයා ගැනිමට හැකිව තිබෙනවා.
ඒ අනුව මෙම වෙළඳසැල් වලට වැඩි මිලට සහල් විකිණිමේ චෝදනාව හා නිෂ්පාදිත දිනය, කල් ඉකුත්වීමේ දිනය යනාදී තොරතුරු සටහන් නොකර භාණ්ඩ අලෙවි කිරීමේ චෝදනාව යටතේ නඩු පැවරිමට කටයුතු කළ බවයි වාර්තා වන්නේ.
