වායු තත්ත්ව දර්ශක අගය අද (30) දිනයේදී සාමාන්‍ය මට්ටමකට පත්ව ඇති බව මධ්‍යම පරිසර අධිකාරියේ මාධ්‍ය ප්‍රකාශක ආචාර්ය අජිත් ගුණවර්ධන මහතා ප්‍රකාශ කරනවා.
පසුගිය දින දෙක තුළ දී වායු තත්ත්ව දර්ශක අගය 150 ඉක්මවා ගිය ද, මේ වනවිට රට මැද බොහෝ තැන්වල වායු තත්ත්ව දර්ශක අගය 50ට අඩු බවයි හෙතෙම පවසන්නේ.
150ට වඩා වැඩි කිසිදු වායු දර්ශක අගයක් එකදු දිස්ත්‍රික්කයකින් හෝ අද වාර්තා වී නැහැ.
සියයට ආසන්න අගයක් පමණක් කොළඹ, ගාල්ල, මාතර, යාපනය යන ප්‍රදේශවල දක්නට ලැබෙන බවත් හෙතෙම කියා සිටියා.
මෙම තත්ත්වය ඉතා ඉක්මනින් පහව යනු ඇතැයි මධ්‍යම පරිසර අධිකාරිය විශ්වාස කරන බවයි එහි මාධ්‍ය ප්‍රකාශකවරයා වැඩිදුරටත් පැවසුවේ.
ඊයේ පස්වරුවේ එක් වරම කොළඹ ඇතුළු තදාසන්න ප්‍රදේශවල අහස තද කළුවර ගතියක් ඇති වූයේ ද මෙම වායු තත්ත්වයේ ඉහළ යෑම හේතුවෙන් බව ද හෙතෙම කියා සිටියා.
මෙවැනි වායු අගයන් ඉහළ යෑමට හේතුව මානවයාගේ අයහපත් ක්‍රියාකාරකම් බවත් ඒ මහතා සඳහන් කළා.
