තමන්ට යළිත් සුපුරුදු පරිදි ක්රීඩා වැදීමට පැමිණීමට හැකි නිශ්චිත දිනයක් කිව නොහැකි බවට ලෝක ටෙනිස් ශූර රෆායෙල් නඩාල් පවසනවා.
නඩාල් පෙන්වාදෙන්නේ තමන්ගේ උකුල් ආබාධයේ ශල්යකර්මයෙන් පසු තුවාල තත්ත්වය තවමත් සම්පූර්ණයෙන් ම සුවය වී නොමැති බැවින්, යළි පිටියට එක් වීම සම්බන්ධයෙන් පවතින්නේ අවිනිශ්චිතභාවයක් බවයි.
ස්පාඤ්ඤ ටෙනිස් ක්රීඩකයෙකු මෙන් ම, ලෝක ටෙනිස් ශ්රේණිගත කිරීම්හි කාලයක් මුල් පුටුව හෙබවූ තරුවක් නම්, ඒ නඩාල් බව ලොවට ම රහසක් නොවේ.
22 වතාවක් ග්රෑන්ඩ් ස්ලෑම් ශූරයා වන නඩාල් පසුගිය ජනවාරි මාසයේ දී ඔස්ට්රේලියානු විවෘත ටෙනිස් තරගාවලියෙන් ඉවත් වූයේ ඇති වූ උකුල් ආබාධය හේතුවෙන්.
ඉන් පසුව එම ආබාධය දරුණු වූ හෙයින්, නඩාල් හට ජුනි මාසයේ දී ශල්යකර්මයකට ද භාජනය වන්නට සිදු වුණා.
ඒ හේතුවෙන් නඩාල් මෙම වසරට ඔහුට නියමිත ව තිබූ සියලු ම ජාත්යන්තර ටෙනිස් තරග කාලසටහනෙන් ඉවත් වූයේ දහසක් ක්රීඩා ලෝලීන්ගේ බලාපොරොත්තු ද සුන් කරමින්.
නමුත් මෙම මස මුල දී, ඔස්ට්රේලියානු විවෘත ටෙනිස් තරගාවලියේ අධ්යක්ෂ ක්රේග් ටයිලි පැවසුවේ නඩාල් එළඹෙන වසරේ දී යළිත් ක්රීඩාවට අවතීර්ණ වනු ඇති බවයි.
නමුත් එහිදී නඩාල්ගේ ස්පාඤ්ඤයේ නියෝජිත Benito Pérez-Barbadillo CNN වෙත පැවසුවේ නඩාල් ඒ සම්බන්ධයෙන් නිශ්චිත දිනයක් ප්රකාශයට පත් කර නැති බවයි.
මෙවන් පසුබිමක් මතයි රෆායෙල් නඩාල් CNNE වෙත සම්මුඛ සාකච්ඡාවකට එක්වෙමින් මේ බව සඳහන් කළේ.
ඒ පෙර සඳහන් කළ පරිදි තමන්ගේ ශල්යකර්ම තුවාලය සම්පූර්ණයෙන් සුව වන දිනයක් නිශ්චිත නොවන බැවින්, ක්රීඩාවට යළි පැමිණීම තවත් දින නියමයකින් තොරව කල් දැමීමට සිදුවනු ඇති බවයි.
තමන්ට තරග කිරීමට නම්; ශාරීරික යෝග්යතාව සියයට සියයක් ම යෝග්ය විය යුතු යැයි තමන්ට හැඟෙන බැවින් මෙම තීරණයට එළැඹි බව ද මෙම ටෙනිස් ශූරයා වැඩිදුරටත් කියා සිටියා.
