ආරවුලක් දුරදිග යාමෙන් මොරගහහේන, මොහොට්ටිගොඩ ප්රදේශයේ කාන්තාවගේ සිරුරට ගිනි තැබූ සිද්ධියක් වාර්තා වනවා.
අදාළ කාන්තාව පදිංචිව සිටි නිවසට හොර රහසේ ඇතුළු වූ අසල්වාසියෙක් විසින් මෙම අපරාධය සිදුකර පළාගොස් ඇති බවයි වාර්තා වුණේ.
බරපතළ පිළිස්සුම් තුවාල ලබා ඇති 63 හැවිරිදි කාන්තාව රෝහල් ගතව ප්රථිකාර ලබනවා.
අදාළ කාන්තාවගේ නිවස ආසන්නයේම පදිංචි සැකකාර පුද්ගලයා ඔහුට අයත් ඉඩමක් කලක සිට රුපියල් ලක්ෂ 60ක මුදලකට විකිණීමට උත්සාහ කර තිබෙනවා.
කෙසේ වෙතත් එම උත්සාහය ව්යාර්ථ වී ඇති අතර, ඉන් කලකට පසු අදාළ ඉඩම රුපියල් ලක්ෂ 80කට විකිණීම සඳහා ගැණුම්කරුවෙකු සොයාගැනීමට සැකකාර පුද්ගලයාට හැකිව ඇති බව සඳහන්.
එහිදී ගැනුම්කරු විසින් ලක්ෂ 80ක ඉඩම මිලට ගැනීමට රුපියල් ලක්ෂ 03ක අත්තිකාරම් මුදලක් ඉඩම අයිති සැකකරුට ලබාදී ඇති බවයි වාර්තා වුණේ.
කෙසේ වෙතත් පසුව අසල්වැසි කාන්තාව ගැණුම්කරුට පවසා ඇත්තේ රුපියල් ලක්ෂ 80කට මිලදීගැනීමට සූදානම් වන්නේ මීට පෙර රුපියල් ලක්ෂ 60කට අලෙවිකිරීමට උත්සාහ කළ ඉඩමක් බවයි.
මෙම තොරතුරත් සමඟ ගැනුම්කරු විසින් එම ඉඩම අනවශ්ය බව පවසා ලබා දී තිබූ අත්තිකාරම් මුදලවන ලක්ෂ 03ක මුදල ද ආපසු ඉල්ලාගෙන තිබෙනවා.
මෙම සිදුවීමෙන් කෝපයට පත් ඉඩම් හිමි සැකකාර පුද්ගලයා මෙලෙස පෙරේදා (24) පස්වරුවේ අදාළ කාත්තාවගේ නිවසට හොර රහසේ ඇතුළු වී ඇයගේ සිරුරට පෙට්රල් වත්කර ගිනි තබා පළාගොස් ඇති බවයි අනාවරණය වී ඇත්තේ.
පළාගියා සැකකරු අත්අඩංගුවට ගැනීමට පොලිසිය විමර්ශන ආරම්භකර තිබෙනවා.
