සකූගේ කතාව කියලා කියන්නේ මීට ටික කාලෙකට කලින් ස්වර්නවාහිනී නාලිකාවේ විකාශය වූ අතිශය සාර්ථක ටෙලි නාට්‍යක්. ප්‍රවීණ චිත්‍රපට සහ ටෙලිනාට්‍ය අධ්‍යක්ෂක ප්‍රියන්ත කොළඹගේ අධ්‍යක්ෂණය කල සකූගේ කතාව එතෙක් මෙතෙක් ශ්‍රී ලාංකීය ටෙලි නාට්‍ය ඉතිහාසය වාර්ථාගත වැඩිම ප්‍රේක්ෂක නැරඹුම් ලැබූ දේශීය ටෙලිනාට්‍ය ලෙසද ඉතිහාසයට එක්වුණා. ඒ LMRB සමීක්ෂණ වාර්තාවන්ට අනුව 14 + වැඩි රේටින්ග් සංඛ්‍යාවක් ලබාගනිමින්. මීට අමතරව සකූගේ කතාව සමාජ ජාලවලද අඩුම කාලයක් තුළ වැඩිම නැරඹුම් ලැබු ටෙලිනාට්‍ය ලෙසද ඉතිහාසයට එක්වුණා.
පසුගිය කොවිඩ් 19 වසංගතයත් සමග සකූගේ කතාවේ දෙවෙනි කොටස රූපගත කිරීමේ කටයුතු තරමක් ප්‍රමාද වූ අතර මේ වන විට එහි රූගත කිරීම් ආරම්භ වී ඇති බව එහි රංගන දායකත්වය දක්වන ජනප්‍රිය කලාකරුවන්ගේ සමාජ ජාලා ගිනුම් වල සටහන් කර තිබුණා. සකූගෙ කතාව දෙවෙනි කොටස සකූගේ ලෝකය ලෙස විකාශය වන්නේ සිරස රූපවාහිනී නාලිකාවේයි.
වැඩිම ප්‍රේක්ෂක ප්‍රතිචාර ලැබූ සහ වැඩිම ආදායම් ඉපැයූ සකූගේ කතාව ස්වර්ණවාහිනී නාලිකාවේ විකාශය නොකිරීම පිලිබද යම් සමාජ කතිකාවතක්ද ඇති වී ඇති අතර පසුගිය කාලසීමාව තුළ සිරස රූපවාහිනී නාලිකාවේ විකාශය වූ සියළුම වැඩසටහන් අතිශය ජනප්‍රියවීම සහ ඉහළ ආදායම් ඉපැයීම ,සකූගේ කතාව එම නාලිකාවට ලබාදීමට හේතුව බවද සදහන්. එලඹෙන මැයි 3 දා සිට සතියේ දිනවල රාත්‍රී 8ට සකූගේ ලෝකය සිරස TV ඔස්සේ විකාශය වීමය නියමිතයි.
සටහන – ඉෂාර නානායක්කාරවසම්
